Eýropada COVID-19 jáne tumaýǵa arnalǵan jalǵan test úlgileri anyqtaldy

ASTANA. KAZINFORM — Eýropa naryǵyna COVID-19 jáne tumaýǵa arnalǵan biriktirilgen jalǵan test úlgileri túsken. Bul týraly Kazinform menshikti tilshisi habarlaıdy.

Euronews málimetinshe, Qytaıdaǵy óndirýshi «FCO24090516» partııasymen taratylǵan testilerdiń jalǵan ekenin rastaǵan.

Portýgalııa bıligi koronavırýs pen A+B tumaýyn qatar anyqtaýǵa arnalǵan ózindik testileý jınaqtarynyń jalǵan nusqalary taralyp jatqany týraly eskertý jibergennen keıin Ispanııanyń Dárilik zattar men medıtsınalyq maqsattaǵy buıymdar jónindegi agenttigi tıisti habarlama alǵan.

Túpnusqa ónim Qytaıdyń Hanchjoý qalasynda ornalasqan Safecare Biotech kompanııasynda óndirilgen. Alaıda anyqtalǵan úlgilerde FCO24090516 partııa nómiri kórsetilgen, al bul nómirdi kompanııa kontrafakt dep tanyǵan.

Ispanııanyń AEMPS agenttigi el aýmaǵynda bul ónimderdiń taralýyn anyqtaý maqsatynda tekserý jumystaryn bastaǵanymen, ázirge atalǵan jalǵan testilerdiń eldegi dárihanalarǵa nemese dıstrıbıýtorlarǵa túskeni týraly dálelder joq.

Atalǵan testiniń FCO-6032 artıkýlymen shyǵarylǵan zańdy nusqalary da bar, bul olardyń syrtqy belgileri boıynsha birden ajyratylýyn qıyndatady.

Jalǵan testilerdiń úsh aıqyn aıyrmashylyǵy anyqtalǵan: ónimge ózgertilgen málimetteri bar japsyrma japsyrylǵan, partııa nómiri FCO24090516 dep kórsetilgen, óndirilgen ýaqyty — 2024 jylǵy qyrkúıek, jaramdylyq merzimi 2026 jylǵy qyrkúıek dep belgilengen.

Qazaqstanda bıylǵy epıdemıologııalyq maýsym bastalǵaly, ıaǵnı 1 qyrkúıek pen 29 qazan aralyǵynda koronavırýs ınfektsııasynyń 74 jaǵdaıy tirkelgen.