Eýropada COVID-19 qaıta órship barady
NUR-SULTAN. QazAqparat – Frantsııada sońǵy táýlikte COVID-19 indetin bes myńnan astam adamnyń juqtyrǵany anyqtalǵanyna qaramastan, el mektepterin ashýǵa daıyndyq júrip jatyr. Bul – Frantsııada sáýir aıynyń ortasynan beri tirkelgen eń joǵary kórsetkish. Aýrýǵa shaldyqqandardyń jalpy sany – 250 myńnan astam adam. Tórt myńnan astam patsıent aýrýhanada jatyr. Bul týraly QazAqparat euronews agenttigine silteme jasap habarlaıdy.
Horvatııanyń Splıt-Dalmatsııa óńirinde bılik vırýsqa shaldyqqan adamdar sanynyń kúrt ósýine baılanysty densaýlyq saqtaý salasyndaǵy sharalardy kúsheıtti. Sońǵy táýlikte munda indet juqtyrǵandardyń rekordtyq sany tirkeldi (358 adam). Qazirgi kezde COVID-19 juqtyrýdyń eki myńnan astam oqıǵasy rastaldy. Horvatııa densaýlyq saqtaý mınıstrliginiń aıtýynsha, jańa patsıentterdiń ortasha jasy 35-te.
Italııada – mamyr aıynan beri táýlik ishinde SOVID-19 juqtyrýdyń eń joǵary kórsetkishi tirkelgen taǵy bir el. Onda indetke shaldyǵýdyń 1367 jańa oqıǵasy tirkeldi, al aýrýǵa shaldyqqandardyń jalpy sany – 260 myńnan astam adam.
Germanııa bıligi jergilikti turǵyndarǵa qyrkúıek aıynyń ortasyna deıin Eýroodaq syrtyndaǵy 160 elge týrıstik sapar jasaýdan bas tartýdy keńes etti. Elde vırýs juqtyrýdyń ósimi qaıta bastalǵan.
Osy arada, Davosta 2021 jyldyń qańtarynda ótkizilýi tıis Dúnıejúzilik ekonomıkalyq forýmnyń uıymdastyrýshylary ony jazdyń basyna qaldyrǵan. Densaýlyq saqtaý salasyndaǵy sarapshylar bıyl kezdesýdi ótkizý óte qaýipti dep sanaıdy.
