Eýropada avıakerosın tapshylyǵy qaýpi kúsheıdi

ASTANA. KAZINFORM – Ormýz buǵazyndaǵy jaǵdaıǵa baılanysty Eýropada avıatsııalyq otyn tapshylyǵy qaýpi artyp, jazǵy týrıstik maýsymǵa qaýip tóndi, dep habarlaıdy Euronews.

ACI Europe dereginshe, birqatar eýropalyq elderdegi avıakerosın qory nebári 8-10 kúnge ǵana jetýi múmkin. Osydan keıin otyndy normalaý sharalaryn engizýge týra keledi.

Sarapshylar Ormýz buǵazy tolyq ashylmasa, Eýropa áýejaılary «júıelik tapshylyqqa» tap bolatynyn eskertedi. Bul ásirese jazǵy týrıstik maýsym qarsańynda áýe kompanııalarynyń jumysyn qıyndatady.

ACI Europe bas dırektory Olıve ıAnkovets Eýrokomıssııaǵa joldaǵan hatynda jaǵdaı buryn boljanǵannan áldeqaıda kúrdeli ekenin atap ótti.

Málimetterge sáıkes, álemdik avıatsııalyq otyn jetkiziliminiń shamamen 40 paıyzy Ormýz buǵazy arqyly ótedi. Qazirgi tańda Parsy shyǵanaǵynda shamamen 170 mln barrel munaı ónimderi bógelip tur.

Naryqtaǵy jaǵdaıǵa qaramastan, AQSh pen Iran arasyndaǵy ýaqytsha bitim ázirge baǵanyń tómendeýine áser etpegen. Avıatsııalyq otyn baǵasy tonnasyna shamamen 1573 dollar deńgeıinde qalyp otyr, bul qaqtyǵysqa deıingi kezeńmen salystyrǵanda eki eseden joǵary.

Birqatar elderde, sonyń ishinde Italııada keı áýejaılar jetkizilimniń úzilýine baılanysty otyndy normalaý sharalaryn engize bastaǵan.

Áýejaılar qaýymdastyǵy Eýropalyq komıssııadan shuǵyl sharalar qabyldaýdy surady. Atap aıtqanda, avıatsııalyq otyndy EO deńgeıinde birlesip satyp alý, sondaı-aq munaı óńdeý zaýyttaryna avıatsııalyq otyn óndirisine basymdyq berý mindetin engizý usynyldy.

Sarapshylardyń pikirinshe, avıakerosın tapshylyǵy kólik baılanysynyń álsireýine ákelip, bul óz kezeginde Eýropa ekonomıkasyna, ásirese týrızm salasyna eleýli soqqy bolýy múmkin. Sonymen qatar, áýe kompanııalary shyǵyndardy azaıtý úshin keıbir baǵyttardy qysqartyp, bılet baǵasyn ósire bastaǵan.

Aıta keteıik, Senat energııany Eýropaǵa eksporttaýǵa arnalǵan qujatty maquldady.