Eýropada áýe otynynyń qory mamyr aıynyń sońyna deıin ǵana jetedi – HEA basshysy
ASTANA. KAZINFORM – Iranmen soǵysqa baılanysty munaı jetkizilimi buǵattalǵan kúıinde qalsa, Eýropada shamamen alty aptaǵa jetetin reaktıvti otyn qory qalady.
Bul týraly Halyqaralyq energetıka agenttiginiń (HEA) basshysy AP agenttigine bergen suhbatynda málimdep, jaqyn arada reısterdiń toqtatylýy múmkin ekenin joqqa shyǵarmady, dep habarlaıdy Kazinform.
Munyń saldary benzın, gaz jáne elektr energııasynyń baǵasynyń ósýine ákeledi
HEA atqarýshy dırektory Fatıh Bırol Ormýz buǵazy arqyly munaı, gaz jáne basqa da mańyzdy jetkizilimderdiń úzilýin «buryn-sońdy bolmaǵan eń iri energetıkalyq daǵdarys» dep atady.
- Buryn «daǵdarys rejımi» dep atalatyn top bolǵan. Qazir bul synı rejım jáne onyń álemdik ekonomıka úshin saldary aýyr bolady. Bul neǵurlym uzaqqa sozylsa, búkil álemdegi ekonomıkalyq ósim men ınflıatsııaǵa soǵurlym nashar áser etedi. Saldary benzın, gaz jáne elektr energııasynyń baǵasynyń ósýine ákeledi, - dedi ol.
Bırol ekonomıkalyq qıyndyqtardyń eń aldymen Azııa, Afrıka jáne Latyn Amerıkasyndaǵy kedeı elderdi qosa alǵanda damýshy elderge áser etetinin atap ótti.
Ol Iranmen qaqtyǵys Ormýz buǵazy arqyly jetkizilimdi qalpyna keltirýge múmkindik beretindeı rettelmese, onyń saldary barlyq elderge áser etetinin aıtyp, eshbir el bul daǵdarystan qorǵalmaǵanyn atap ótti.
- Eýropada bizde shamamen alty aptaǵa jetetin áýe otyny qaldy. Eger biz Ormýz buǵazyn asha almasaq, jaqyn arada A qalasynan B qalasyna keıbir reıster otyn tapshylyǵyna baılanysty toqtatylýy múmkin degen jańalyqtardy estıtinimizdi aıta alamyn, - dep eskertti HEA basshysy.
Daǵdarystan keıin energetıkalyq júıeni qalpyna keltirý eki jylǵa deıin ýaqytqa sozylýy múmkin
Bırol atap ótkendeı, Parsy shyǵanaǵynda kútip turǵan 110-nan astam munaı tankeri men 15-ten astam suıytylǵan tabıǵı gaz quıylǵan tanker Ormýz buǵazy arqyly álemdik naryqtarǵa shyǵa alsa, energetıkalyq daǵdarysty jeńildetýge kómektese alatyn edi.
- Aımaqtaǵy 80-nen astam mańyzdy nysan zaqymdaldy. Osy 80 nysannyń úshten bir bóliginiń astamyna aýyr nemese óte aýyr zaqym tıgen. Beıbitshilik týraly kelisimge qol jetkizilgenniń ózinde, áskerı nysandar men energetıkalyq resýrstarǵa keltirilgen zalal óndiris deńgeıin qaqtyǵys aldyndaǵy deńgeıge qalpyna keltirý úshin birneshe aı qajet bolýy múmkin degendi bildiredi, - dedi ol.
Bırol daǵdarys aldyndaǵy deńgeıge oralý shamamen eki jylǵa sozylýy múmkin birtindep júretin protsesti qajet etetinin atap ótti.
Osyǵan deıin Eýropada áýe otyny baǵasy rekordtyq deńgeıge jetkeni habarlandy.
Ormýz buǵazyndaǵy jaǵdaıǵa baılanysty Eýropada avıatsııalyq otyn tapshylyǵy qaýpi artyp, jazǵy týrıstik maýsymǵa qaýip tóndi.
Sondaı-aq eýropalyqtar benzın baǵasynyń ósýine baılanysty jappaı elektrli kólikterge aýysyp jatqanyn jazdyq.
