Eýropada áýe otyny baǵasy rekordtyq deńgeıge jetti

ASTANA. KAZINFORM – Eýropada áýe otyny baǵasy tonnasyna rekordtyq 1 900 dollarǵa jetti, dep habarlaıdy Kazinform agenttiginiń Brıýsseldegi menshikti tilshisi. 

Bul týraly eýropalyq Politico basylymy habarlady. Ulybrıtanııa eń osal el boldy. Londondyq Hıtroý jáne basqa da brıtandyq áýejaılar otyn baǵasynyń kúrt ósýine baılanysty reısterdi toqtata bastady. Kelesi kezekte Frantsııa áýejaılary bolýy múmkin.

Eýropalyq BAQ habarlaýynsha, EO-nyń qalǵan elderinde avıatsııalyq otyn qory ázirge birneshe aıǵa jetip qalýy múmkin. 

Baǵanyń rekordtyq ósýi Iranmen qaqtyǵys aıasynda Ormýz buǵazy arqyly jetkizilimniń úzilýimen tikeleı baılanysty. Naryq agenttikteriniń málimetinshe, keıingi birneshe kúnde ǵana baǵa tonnasyna shamamen 300 dollarǵa ósip, burynǵy rekordtan asyp tústi. 

Sarapshylar buǵazdy odan ári qorshaý Eýropanyń avıatsııa salasyna odan ári qysym jasaıtynyn, aldaǵy aptalarda bıletter baǵasynyń ósýine jáne reısterdiń keńinen toqtatylýyna ákeletinin eskertti. 

Osyǵan deıin eýropalyqtar benzın baǵasynyń ósýine baılanysty jappaı elektrli kólikterge aýysyp jatqanyn jazdyq. 

Sondaı-aq aqpan aıynda Semeı áýejaıy avıaotyn baǵasyn negizsiz kótergeni úshin jaýapqa tartylǵanyn jazdyq.