Eýropada atom energetıkasyn qysqartý úlken qatelik boldy – Eýrokomıssııa basshysy
ASTANA. KAZINFORM – Eýrokomıssııa basshysy Ýrsýla fon der Lıaıen Eýropada atom energetıkasyn qysqartýdyń strategııalyq qatelik bolǵanyn málimdedi, dep habarlaıdy DW.
– Sońǵy jyldary biz álemde atom energetıkasynyń qaıta jandana bastaǵanyn kórip otyrmyz. Eýropa da osy jańǵyrýdyń bir bóligi bolǵysy keledi, — dedi Ýrsýla fon der Lıaıen Parıj mańynda ótken ıadrolyq energetıka jónindegi sammıtte.
Onyń aıtýynsha, Eýroodaq ónerkásip pen halyqty qoljetimdi ári ekologııalyq taza energııamen qamtamasyz etý úshin atom energetıkasyn damytýǵa yntalandyrady.
– Sondyqtan búgin biz shaǵyn modýldik reaktorlarǵa arnalǵan jańa eýropalyq strategııany usynyp otyrmyz. Bizdiń maqsatymyz qarapaıym: bul jańa tehnologııa 2030 jyldardyń basyna qaraı Eýropada qoldanýǵa daıyn bolýy tıis, — dep atap ótti fon der Lıaıen.
Onyń aıtýynsha, Eýropa jańa býyndaǵy atom energetıkasynyń jahandyq ortalyǵyna aınalýy kerek.
Alaıda is júzinde ázirge «qaıta jandaný» baıqalmaı otyr. World Nuclear Industry Status Report derekterine sáıkes, ótken jyly álemde jalpy qýaty 4,4 GVt bolatyn tórt jańa reaktor paıdalanýǵa berilgen. Olardyń ekeýi Qytaıda, bireýi Úndistanda jáne bireýi Reseıde. Al jalpy qýaty 2,8 GVt bolatyn jeti reaktor paıdalanýdan shyǵarylypty.
Qazirgi tańda búkil Amerıka qurlyǵynda birde-bir kommertsııalyq atom reaktory salynyp jatqan joq.
Al Eýropalyq odaqta qurylys júrip jatqan jalǵyz nysan — Slovakııadaǵy Mohovtse-4 reaktory. Onyń qurylysy 1985 jyly bastalǵan.
Eske sala ketsek, byltyr Japonııa álemdegi eń iri atom elektr stantsııasyn qaıta iske qosatynyn jazdyq.
Al Qazaqstan men Koreıa atom energetıkasy jobalaryn birlesip damytýǵa nıetti.
