Eýropada alǵashqy eko-meshit boı kótermek
ASTANA. 26 shilde. QazAqparat - Ulybrıtanııanyń Kembrıdj qalasynda ekologııalyq talaptarǵa saı keletin alǵashqy meshit salynbaq.
Bul týraly muftyat.kz saıty jazady.
Akademııalyq musylmandar qaýymynyń ókili Tım Ýınterdiń aıtýynsha: «Islam órkenıeti qorshaǵan orta men tabıǵatty qorǵaýǵa erekshe mán bergeni anyq. Sondyqtan, jergilikti qalalyq musylman qaýymy da tabıǵatty, qorshaǵan ortany qorǵaýǵa baǵyttalǵan zamanaýı bastamalardy qoldaıdy».
Meshittiń ishin salqyndatyp-jylytý úshin arnaıy geotermaldy jylytqysh nemese salqyndatqysh sorǵyshtardy qoldaný josparlanbaq. Sonymen qatar, Tım Ýınter bylaı dep málimdedi: «Jańa eko-meshitti salý úshin, biz sońǵy jetistikterge jetken jańa tehnologııany qoldandyq. Qýatty únemdeıtin qondyrǵylar men jasyl shatyrlardy ornatý arqyly qorshaǵan ortamyzǵa zııan keltiretin zattar bul jerden tabyla da qoımas».
Meshittiń aýlasynda velosıpedter qoıylatyn arnaıy turaqtar bolady. Bul turaqty saýyraǵashtan jasalǵan sharbaq qorshap turady. Al sharbaq kishigirim saıabaqpen jalǵasady eken.
Meshittiń jospary ekologııalyq talaptarǵa tolyqtaı jaýap berip, jańartylyp otyratyn tabıǵı qýat kózine súıenetindikten, bolashaqta bul meshit Kembrıdj qalasynyń kóz tartarlyq ornyna aınalyp, Eýropa elindegi eń alǵashqy ekologııalyq talaptarǵa saı eko-meshit bola alady dep kútilýde.
