Eýropada áleýmettik shyǵyn boıynsha Germanııa kósh bastady
ASTANA. KAZINFORM — Germanııada federaldyq bıýdjet shyǵysynyń 41%-y áleýmettik salaǵa, al 16%-y densaýlyq saqtaý salasyna baǵyttalady dep esepteıdi Germanııa ekonomıka ınstıtýty. Bul eki kórsetkish te Eýropada eń joǵary deńgeıde, dep habarlaıdy DW.
Keln qalasyndaǵy Germanııa ekonomıka ınstıtýtynyń (IW) zertteýine sáıkes, Germanııa áleýmettik salaǵa federaldyq bıýdjettiń 41%-yn jumsaıdy, bul Soltústik Eýropa elderin qosa alǵanda, basqa barlyq eýropalyq memleketten joǵary.
Salystyrý úshin: Soltústik Eýropa elderi, sondaı-aq Aýstrııa men Shveıtsarııa áleýmettik qajettilikterge bıýdjettiń 40%-yn bólse, Belgııa, Nıderlandy jáne Lıýksembýrg — 38% jumsaıdy. EO boıynsha ortasha kórsetkish — 39%.
Áleýmettik shyǵystardyń jartysy zeınetaqyǵa jumsalady
Zertteý avtorlarynyń aıtýynsha, Germanııa federaldyq bıýdjetiniń áleýmettik shyǵysynyń jartysyna jýyǵy zeınetaqymen qamsyzdandyrýǵa tıesili. Densaýlyq saqtaý salasyna bólinetin qarajat 16%. Bul kórsetkish Soltústik Eýropa elderi men Benılıýks memleketterinde de dál osyndaı deńgeıde jáne Eýropadaǵy eń joǵarysy bolyp sanalady.
Germanııada memlekettik basqarýǵa bólinetin shyǵyndar da salystyrmaly túrde joǵary. Zerttelgen kezeńde bul kórsetkish 7,2%-dan 11%-ǵa deıin ósken. Al bilim berý salasyna bólinetin qarajat Germanııada memlekettik bıýdjet kóleminiń tek 9,3%-yn quraıdy. Salystyrý úshin: zertteý málimetinshe, Avstrııa men Shveıtsarııa bilimge shamamen eki ese kóp ınvestıtsııa salady.
Zertteý kezeńinde 2001 jyldan 2023 jylǵa deıin Germanııada qorǵanysqa federaldyq bıýdjet shyǵysynyń ortasha eseppen 2,3%-y, bul JІÓ-niń 1,1%-yna teń, bólingen.
Áleýmettik shyǵystardyń ósýine qarsy turý jóninde usynys
Germanııa ekonomıka ınstıtýty 2001–2023 jyldar aralyǵyndaǵy federaldyq bıýdjet shyǵysynyń ártúrli baptaryn taldady. Zertteý jalpy shyǵystardy da, jekelegen salalarǵa bólinetin qarjyny da qamtydy. Salystyrý Batys Eýropa elderimen (Benılıýks elderi, Avstrııa, Shveıtsarııa) jáne Soltústik Eýropa memleketterimen (Danııa, Shvetsııa, Norvegııa, Fınlıandııa, Islandııa) júrgizildi, óıtkeni bul elder Germanııaǵa ekonomıkalyq damý deńgeıi men mádenı kontekst turǵysynan jaqyn.
IW sarapshylary Berlın úkimetine «memlekettiń qyzmetin ári qaraı keńeıtýden jáne áleýmettik shyǵystardyń ósýinen bas tartýǵa qarsy turýdy» usynady.
Aıta ketelik Germanııada deportatsııa 18%-ǵa ósti: zańsyz mıgranttardy shyǵarý kúsheıtiletinin jazǵan edik.