Eýropada 7 ushaqqa bomba qoıylǵany týraly jalǵan aqparat tarady
ASTANA. KAZINFORM — 3 qarashada Eýropa qalalary arasynda qatynaıtyn 7 jolaýshylar ushaǵynyń bortynda jarylǵysh zat bar ekeni týraly habarlama túsken. Alaıda barlyq aqparattyń jalǵan ekeni anyqtaldy, dep habarlaıdy Deutsche Welle.
Jeti ushaqtyń tórteýi Irlandııanyń Ryanair áýe kompanııasyna tıesili bolǵan. Onyń ekeýi Varshavaǵa, taǵy ekeýi Sofııaǵa baǵyt alǵan. Qalǵan ushaqtardyń ekeýi Rımge, bireýi Ispanııanyń Mýrsııa qalasyna ushyp bara jatqan.
Londonnan Varshavaǵa baǵyt alǵan Polshanyń LOT áýe kompanııasynyń ushaǵy Shopen áýejaıynyń ornyna jaqyn mańdaǵy Varshava-Modlın áýejaıyna baǵyttaldy. Ushaq qonǵannan keıin áýejaı tekserý jumystaryna baılanysty ýaqytsha jabyldy.
Taǵy bir ushaq — Kopengagennen ushyp shyqqan Scandinavian Airlines (SAS) áýe kompanııasynyń laıneri Shopen áýejaıyna qondy. Tekserý kezinde onyń bortynan kúdikti zattar tabylǵan joq.
Sondaı-aq Dýblın men Mılan-Bergamo áýejaıynan Sofııaǵa baǵyt alǵan Ryanair jáne Wizz Air ushaqtaryna da bomba qoıylǵany týraly habar túsken. Budan bólek, Ryanair kompanııasynyń úsh ushaǵy tekserildi. Onyń biri Mýrsııaǵa, al Lıssabon men Dýblınnen ushyp kelgen ekeýi Rımge qonǵannan keıin tekserýden ótti.
Reuters agenttigi 2 qarashada bolǵan oqıǵany da eske saldy. Sol kúni Londonnan Sofııaǵa baǵyt alǵan Wizz Air ushaǵyna bomba qoıylǵany týraly habar túsken. Sonyń saldarynan laıner Vengrııa áskerı ushaǵynyń ilesip júrýimen Býdapesht áýejaıyna shuǵyl qonǵan. Alaıda borttan jarylǵysh zat tabylmaǵan.
Osprey Flight Solutions konsaltıngtik kompanııasynyń taldaý bóliminiń jetekshisi Rıs Djonstyń pikirinshe, jalǵan habarlamalarda naqty bir eldiń, áýe kompanııasynyń nemese baǵyttyń nysanaǵa alynbaýy áýe qatynasyn tutastaı buzýǵa baǵyttalǵan áreket bolýy múmkin.
Jalǵan habarlamalardy kimniń taratqany ázirge belgisiz.
Aıta keteıik, Astanaǵa qatysty jalǵan bomba habarynyń avtory Ýkraınada ustaldy.
