Eýropada 400 myńnan astam KitKat shokolady tıelgen júk kóligi izdestirilip jatyr
ASTANA. KAZINFORM – Italııadan Polshaǵa baǵyt alǵan 413 myń KitKat batonchıkteri tıelgen júk kóligi jolda joǵalyp ketti, dep habarlaıdy BILD.
Másele F1 jańa serııasynyń ónimderi týraly bolyp otyr. Kompanııanyń málimetinshe, júk kóligi ótken aptada Italııadan shyqqan jáne Eýropanyń birneshe eline taýar jetkizýi tıis bolǵan, alaıda sodan beri onyń qaıda ekeni belgisiz.
Nestle kompanııasy bul is boıynsha jergilikti bılik organdarymen jáne logıstıkalyq seriktesterimen birlesip tergeý júrgizip jatqanyn málimdedi. Kompanııa urlanǵan táttilerdiń beıresmı arnalar arqyly naryqta paıda bolýy múmkin ekenin joqqa shyǵarmaıdy.
Olardy shtrıhkodtar arqyly baqylaý josparlanyp otyr: eger taýar satylymǵa túsip, kassada skanerlense, óndirýshige habar beretin arnaıy júıe qarastyrylǵan.
Sonymen qatar, Nestle urlanǵan ónimderdi anyqtaýǵa arnalǵan Stolen KitKat Tracker quralyn usyndy. Onyń kómegimen satyp alýshylar taýardyń serııalyq nómirin teksere alady. Kompanııa bul oqıǵa jetkizilimderge áser etpeıtinin jáne tapshylyq bolmaıtynyn atap ótti.
Aıta ketelik BAÁ, Kýveıt, Saýd Arabııasy jáne Qatar Nestle balalar taǵamyn keri qaıtara bastaǵany týraly jazǵan edik.
