Eýropada 2026 jyly eń arzan demalys qaı elde
ASTANA. KAZINFORM – 2026 jyly Túrkııa Eýropadaǵy tanymal týrıstik baǵyttardyń ishinde eń qoljetimdi el atandy. Al qonaqúı men qoǵamdyq tamaqtaný qyzmetteriniń baǵasy boıynsha Portýgalııa eń tıimdi baǵyt bolyp shyqty, dep habarlaıdy Euronews.
Sarapshylar Eýropadaǵy jeti tanymal týrıstik eldegi demalys qunyn salystyrǵan. Zertteý barysynda Eýrostattyń ulttyq baǵa ındeksteri paıdalanyldy. Olar elderdegi taýarlar men qyzmetterdiń ortasha baǵasyn kórsetedi. Alaıda mamandar tanymal kýrorttardaǵy baǵalar el boıynsha ortasha kórsetkishten ózgeshe bolýy múmkin ekenin atap ótti.
Máselen, Afınadaǵy jáne Kos aralyndaǵy qonaqúı baǵasy aıtarlyqtaı erekshelengenimen, esepteý kezinde ekeýi de Grekııanyń ortasha kórsetkishine engizilgen.
Baǵalaýda úı sharýashylyqtarynyń túpkilikti tutyný shyǵystarynyń (HFCE) ındeksi qoldanyldy. Eger Eýroodaqtaǵy ortasha tutyný sebetiniń quny 100 eýro dep alynsa, onda:
-
Túrkııa – 59,6 eýro;
-
Horvatııa – 78,4 eýro;
-
Portýgalııa – 86,6 eýro;
-
Grekııa – 87,4 eýro;
-
Ispanııa – 91,6 eýro;
-
Italııa – 97,1 eýro;
-
Frantsııa – 100,3 eýro.
Zertteý nátıjesi boıynsha Túrkııadaǵy baǵalar Eýroodaqtaǵy ortasha deńgeıden shamamen 40%-ǵa tómen bolsa, Frantsııa eń qymbat baǵyt atandy.
Sarapshylar qonaqúıde turý men qoǵamdyq tamaqtaný qyzmetteriniń baǵasyn da jeke salystyrǵan.
– Bul sanat boıynsha eń joǵary kórsetkish Frantsııada tirkeldi – 116. Odan keıin Italııa – 110,8. Al eń qoljetimdi baǵyt retinde Portýgalııa tanyldy. Munda qonaqúı men meıramhana qyzmetteriniń ındeksi 73,6 bolyp, Eýroodaqtaǵy ortasha deńgeıden 26,4%-ǵa tómen boldy, – delingen zertteýde.
Aıta keteıik, aptap ystyqtan Frantsııadaǵy týrıstik nysandardyń jumys ýaqyty qysqardy.
