Eýropada 2026 jylǵy alǵashqy aptap ystyq bastalady
ASTANA. KAZINFORM — Ispanııanyń keıbir aımaqtarynda 23 jáne 24 mamyrda aýa temperatýrasy 38°C deıin kóterilmek. Frantsııa men Anglııanyń ońtústiginde 33°C, Germanııada 31°C deıin jylynady, dep habarlaıdy DW.
Klımattyq modelderge sáıkes, qazirgi ýaqytta Eýropada mamyr jáne maýsym aılaryndaǵy ystyq tolqyndardyń paıda bolý yqtımaldyǵy ındýstrııaǵa deıingi dáýirmen salystyrǵanda 10 ese artqan.
— Germanııa bul jaǵynan aıqyn mysal bolyp tur. 1980-jyldary Elýinshi kún merekesi kezinde (katolıkter bıyl ony 24 mamyrda atap ótedi) aýa temperatýrasy 30°C bolýy sırek kezdesetin, al qazir bul jaǵdaı elde turaqty túrde baıqalady, — deıdi meteorologııalyq onlaın-servıs WFY24 negizin qalaýshy Ioanna Verdjını.
Ol Eýropa elderiniń ınfraqurylymy, aýyl sharýashylyǵy jáne densaýlyq saqtaý júıeleri áli de «eski kúntizbege beıimdelgen» jáne bıylǵy kóktemde mundaı joǵary temperatýraǵa daıyn emes ekenin eskertedi.
Tómengi Saksonııanyń qorshaǵan ortany qorǵaý mınıstri Krıstıan Maıer jurtshylyqty klımattyń ózgerýine baılanysty jıi bolatyn qurǵaqshylyqtan týyndaǵan jerasty sýlarynyń tapshylyǵyna baılanysty sýdy únemdeýge shaqyrdy.
Eske sala keteıik, 2026 jyldyń maýsymyna qaraı Tynyq muhıtynyń ortalyq jáne shyǵys bóliginde El-Nıno qubylysy qalyptasýy múmkin. Mamandardyń aıtýynsha, bul álem boıynsha temperatýranyń kúrt kóterilýine sebep bolýy yqtımal.
