Eýropa Jerge jaqyn keńistikti tazartýdy qolǵa aldy

ASTANA. KAZINFORM — Eýropa ǵarysh agenttiginiń Nóldik qaldyqtar hartııasy 2030 jylǵa qaraı jaramsyz spýtnıkterdi Jerge qaıtaryp, joıýǵa nemese zııansyz etýge shaqyrdy, dep habarlaıdy Euronews. 

Jerge jaqyn keńistik tarylyp jatyr. Oǵan kóptegen jasandy spýtnıkter ushyryldy.

Onyń kóbi Jerden myń shaqyrymdaı tómen orbıtada qozǵalady nemese 30 myń km bıiktikte geostatsıonarlyq orbıtada ilinip tur.

Budan basqa, ǵaryshta qoqys kóp jınaldy. Bul keńistikti turaqty, taza jáne qaýipsiz ustaý qajettigi artyp keledi.

Eýropa ǵarysh agenttiginiń Brıýsseldegi forýmynda talqylanǵan taqyryptardyń biri osy boldy.

Keı kompanııalar spýtnıkterdiń kómegimen ǵalamsharymyzdyń shalǵaı jerlerine ınternetke qalaı qol jetkizetinin aıtty. 

«Bizdiń barlyq jerserikterimizdiń belsendi qozǵalys júıeleri bolady. Úlken qaqtyǵystardyń aldyn alý úshin olardy manevrleı alamyz. Bul qurylǵylarymyz usaq qoqystardyń zaqymdanbaýy úshin arnaıy saýytpen qaptalǵan. Spýtnıkterdiń eń mańyzdy elementteri qorǵalady», — dedi Amazon Kuiper jobasynyń qatysýshysy Djordı Kazanova. 

Agenttiktiń málimetinshe, Jer orbıtasynda shamamen 12,5 myń spýtnık bar. Jumys merzimi aıaqtalǵannan keıin olardy joıý, Jerge qaıtarý nemese zalalsyzdandyrý kerek.

«Ǵaryshtyq jarys qarqyn alyp keledi. Qazir mysaly, Qurama Shtattar spýtnıkter men kemelerdiń búkil túrin paıdalanyp jatyr. Jerge jaqyn keńistik tek áskerılerge ǵana emes, bızneske de qyzmet etýde. Jekemenshik fırmalar ǵaryshqa óz spýtnıgin ushyrýǵa kóbirek qyzyǵýshylyq tanytýda», — dedi Eýropa ǵarysh agenttiginen Gızela Zıýss. 

Biraq eń kúrdeli másele — mundaı apparattar ǵaryshta qala otyryp, ýaqyt óte kele jumysyn toqtatady. 2,7 myńǵa jýyq spýtnık osyndaı jaǵdaıda. 

Budan bólek, úlken jyldamdyqpen ushatyn jáne úlken zııan keltirýi múmkin usaq bólshekter men qoqystar qaýip tóndiredi.

Onyń aldyn alý jáne keńistikti tazartý maqsatynda aenttik Nóldik qaldyqtar hartııasyn qabyldady.

Hartııanyń maqsaty — 2030 jylǵa qaraı qaraýsyz qalǵan orbıtalyq apparattar sanyn nólge deıin azaıtý. Bul — joǵary talaptary bar, oryndalýy tıis qujat. 

Eýropalyq ǵarysh aktisi aldaǵy aılarda Brıýsselde tanystyrylady. 

Bul EO-nyń Jerge jaqyn keńistikti beıbit ıgerýge qatysýyn retteıtin birinshi zań bolmaq.