Eýropa trıýmfatory Amına Eseı: El chempıonatynda minsiz úılesimdi kórsetkim keledi
ASTANA. KAZINFORM — Amına Eseı alǵash ret 3 jasynda atqa mingen. 11 jasynda óziniń alǵashqy tulparyna otyrady. Al 13-ke qaraǵan shaǵynda almatylyq jas shabandoz Eýropa nazaryn Qazaqstannyń at sportyna aýdardy. Ótken jazda onyń jarqyn jeńisteriniń qurmetine elimizdiń kók baıraǵy 6 ret kóterildi. Al Nıderlandtaǵy sońǵy jarysta altyn medal jeńip aldy.
Qarapaıym jattyǵýlardyń tereń máni
«Eýropada eki jarym aı boldyq, – deıdi Amına. – Shilde aıynyń basynda, Aqbulaqtaǵy (Almaty oblysy – red.) jarystan keıin birden ushyp kettik. Bizben birge jattyqtyrýshylar Áset Toqymbekov pen Daıana Onaeva bardy. Sonymen qatar Eýropanyń jergilikti mamandarymen, mysaly, Albert myrzamen de (Albert Smıt – red.) qosymsha jattyqtyq. Kestemiz óte tyǵyz boldy: apta saıyn týrnırlerge qatystyq. Jarystardyń ózine eki-úsh kún jumsaldy. Negizinen juma, senbi jáne jeksenbi kúnderi ótetin».
Eýropadaǵy oqý-jattyǵý jıyndary jas shabandozdyń jattyǵý úderisine degen kózqarasyn ózgertti. Amınanyń aıtýynsha, ol bazalyq jattyǵýlardyń mańyzyn osy shetelde túsingen.
«Eýropadan keıin syrt kózge maǵynasyz bolyp kórinetin qarapaıym jattyǵýlardyń ne úshin qajet ekenin túsindim. Mysaly, bir orynda aınalý nemese volt jasaý. Shyn máninde, olardyń astarynda bir qaraǵanda baıqala bermeıtin tereń mán bar. Bul jattyǵýlar atqa mingende kóp kómektesedi. Eýropaǵa saparym jattyǵýǵa degen qulshynysymdy arttyryp, bar kúshimdi salýǵa yntalandyrdy», – deıdi sportshy.
Adrenalın, tepe-teńdik jáne bes tulpar
Amına úshin sport túrin tańdaý qıyn bolmaǵan. Konkýr – jyldamdyq pen bıiktikten qoryqpaıtyn jandarǵa arnalǵan sport.
«Konkýrmen aınalysýdy osy sport túri syılaıtyn adrenalın úshin bastadym, – deıdi Amına. – Biraq munda tek kúshtiń bolýy mańyzdy emes. Ózińdi ustaı bilý, tepe-teńdikti saqtaý jáne eń bastysy, atpen til tabysa bilý qajet».
Búginde Amınanyń komandasynda minezi men ereksheligi ártúrli bes tulpar bar. Jas shabandoz olardyń árqaısysymen til tabysýdyń ózindik jolyn tapqan.
Bordo – Amınanyń alǵashqy aty. Baısaldy minezdi, gannover tuqymdy aıǵyr. Ataqty Baloubet du Rouet tulparynan týǵan. Dene bitimi iri, minezi bar. «Ol birden erkelep, jýas bola qoıatyn jylqy emes. Bordomen uzaq ýaqyt jumys isteý kerek. Ol saǵan úırenip, jaqsy kórýi úshin birtindep baýyr bastyrý qajet», – deıdi shabandoz.
Tiësto van d’Abelendreef – Amınanyń Eýropadan ákelgen alǵashqy tulpary. Meıirimdi bolǵanymen, óte qyzýqandy ári shıraq aıǵyr. Sporttyq áleýeti de zor. «Meniń eń bıik armanym – bolashaqta dál Testomen birge Olımpıada chempıony ataný», – deıdi Amına.
Sab Zıro Blıý – tórt jastaǵy jas sur aıǵyr. Ol da Baloubet du Rouet tulparynyń uly. Amına onymen ázirge bir-aq ret jattyqqan, alaıda bolashaǵynan úlken úmit kútedi.
Cherry JVH Z – Eýropadan ákelingen tájirıbeli ári óte jýas bıe. Cigaret tulparynyń qyzy, aty ańyzǵa aınalǵan Clinton-nyń nemeresi. «Ol óte meıirimdi. Kez kelgen jaǵdaıda oǵan senim artýǵa bolady. Ol marshrýtta árdaıym qutqaryp, qoldaý kórsetedi», – deıdi Amına súıispenshilikpen.
ıÝnaıted Speshl Z – komandanyń eń jas múshesi. Úsh jastaǵy jıren aıǵyr, qazirgi tańda óte tanymal United Touch tulparynyń uly. Qazir Eýropada júr. Sol jaqta erkin ósip, bolashaq sporttyq mansabyna daıyndalyp jatyr.
Amınanyń súıikti tulparlaryna kútim jasaýda da óz erejeleri bar. Ol at qorasyna kóbine alma men sábiz alyp barady. Degenmen, bir mańyzdy erekshelik bar.
«Eger at erttelip, alańǵa shyǵýǵa daıyn tursa, oǵan tek qant beremin. Jylqynyń aýzyna júgenniń temir bóligi – trenzel salynǵan kezde sábiz berý qaýipti», – deıdi ol.
Mektep pen at klýby arasyndaǵy kún tártibi
Jarqyn jeńisterdiń artynda qatań tártip pen orasan eńbek jatyr. Amına joǵary deńgeıdegi sportty úzdik oqýmen qatar alyp júrýge bolatynyn dáleldep keledi.
«Sabaqty óte jaqsy oqýǵa tyrysamyn. Barlyǵyna úlgerý úshin tańerteń erte mektepke baryp, muǵalimdermen qosymsha sabaq oqımyn. Keshke birden at klýbyna ketemin. Jolda kólikte kele jatyp, úı tapsyrmasynyń bir bóligin oryndaımyn. Úıge keshki saǵat 9-10 shamasynda oralamyn. Sodan keıin qaıtadan kompıýterge otyryp, úı tapsyrmalaryn aıaqtaımyn, jańa taqyryptardy oqımyn», – deıdi Amına kúndelikti tártibi týraly.
Demalys kúnderi de sportshy tańerteńnen keshke deıin manejde júredi. Ýaqytynyń bári jattyǵýmen ótpeıdi. Amına attaryna ózi kútim jasaıdy, dostarymen aralasyp, birge serýendeýge de úlgeredi.
Eń basty jarys – el chempıonaty
Qazir Amınanyń artynda Qazaqstan chempıonatyna daıyndyqpen ótken qarbalas bir jyl tur. Jarys alańyna shyǵar aldynda jas chempıon túrli sezimdi bastan keshiredi.
«Boıymda qobaljý da, qýanysh ta bar. Qýanyshym – osynsha ýaqyt boıy tabandy túrde daıyndalǵan týrnırge jetkenime baılanysty. Al qobaljý zor jaýapkershilikten týyndaıdy. Men ózimniń nege qabiletti ekenimdi barshaǵa dáleldep, kórsetsem deımin. Jylqylarmen durys jumys isteı alatynymdy, saýatty shaba alatynymdy jáne olarmen minsiz úılesim taba biletinimdi kórsetkim keledi», – deıdi jas sportshy.
Eske salsaq, 20 jyldan keıin Qazaqstan Azıadaǵa qaıta oralyp, konkýrdan TOP-20 qataryna engen edi.
