Eýropa parlamentiniń otyrystaryna qatysatyn depýtattar azaıyp barady
ASTANA. KAZINFORM — Eýropa parlamentiniń Bas hatshysy Alessandro Kokkettı komıtet otyrystary men plenarlyq pikirtalastarǵa qatysatyn depýtattar sany aldyńǵy onjyldyqtarǵa qaraǵanda azaıyp bara jatqanyn málimdedi.
— Men osy Parlamentte 32 jyl jumys istep kelemin jáne komıtetterdegi músheler sany azaıǵanyn baıqap júrmin, — dedi Alessandro Kokkettı.
Onyń aıtýynsha, tek depýtattar sany azaıýmen qatar, jumys ádisterin berý máselesinde sabaqtastyq álsirep barady.
— Biz Parlament músheleri arasynda jumys ádisteri men kásibı ádetterdi berýdegi alshaqtyqty kórip otyrmyz. Bizde urpaqtar arasyndaǵy alshaqtyq bar, — dep atap ótti Bas hatshy.
Kokkettı bul ózgeristi qashyqtan jumys isteý tájirıbesin qalyptastyrǵan COVID-19 pandemııasymen jáne depýtattardyń jıi aýysýymen baılanystyrdy. 2019 jáne 2024 jyldardaǵy saılaýda Eýropa parlamentine alǵash ret saılanǵan kóptegen depýtattar boldy. Bul, onyń aıtýynsha, dástúrli jumys modelin ózgertti.
Eýroparlamentte shırek ǵasyrǵa jýyq ýaqyt qyzmet etken, sotsıal-demokrat Bernd Lange de osy pikirmen kelisedi. Onyń aıtýynsha, buryn komıtet otyrystaryna múshelerdiń shamamen 30 paıyzy qatyssa, qazir bul kórsetkish tómen.
Pandemııa kezinde pikirtalastarǵa qatysýǵa degen kózqaras ózgerdi, sondaı-aq óziń sóz sóılemeıtin pikirtalastarǵa qatysý qajettiligin túsiný de ózgerdi, — dedi Lange.
Ol qatysýshylardyń az bolýynyń sebepteri retinde qysqa, sóz sóıleýge qysqa reglament bólinetinin jáne áleýmettik jelilerdi keltirdi.
— Jalpy alǵanda, mádenıet ózgerdi, — dep sózin túıindedi Eýroparlament múshesi.
Parlamentte eki merzim qyzmet etken nıderlandtyq Gerben-ıAn Gerbrandı de burynǵy depýtattar men qazirgi býyn arasyndaǵy aıyrmashylyq arasy «jer men kókteı» ekenin atap ótip, bul ınstıtýttyń ózine zııan keltiretinin málimdedi. Ol klımat ózgerýine arnalǵan halyqaralyq sarapshylardyń otyrysyna sanaýly ǵana depýtattyń kelgenin mysal keltirdi.
Al 2024 jyly alǵash saılanǵan aýstrııalyq Eýroparlament depýtaty Anna Shtıýrk («Eýropany jańartý», NEOS) basqa pikirde. Onyń aıtýynsha, jańa býyn Eýroparlamenttiń qurylymyn áli úırenip jatyr, onyń ústine jumys tek Brıýssel men Strasbýrgte ýaqyt ótkizýmen shektelmeıdi.
— Komıtette kóp otyrmaıtynym meniń óz jumysymdy atqaryp jatqanymdy bildiredi, — dedi Shtıýrk saılaýshylarmen kezdesýlerin meńzep.
2025 jyldyń qańtarynda assambleıa prezıdenti Roberta Metsola fraktsııa basshylarymen plenarlyq pikirtalastardyń bir bóligin ózgertýge arnalǵan pılottyq format týraly kelisti.
Oǵan sáıkes, sóz sóıleý kestesi aldyn ala jarııalanbaıdy, sondyqtan Eýroparlament depýtattary ózi sóz sóıleıtin kezde ǵana kelmeı, otyrystyń basynan aǵyna deıin zalda bolady. Kokkettı buǵan deıin ákimshilik «jylqyny sýǵa apara alady, biraq ony sý ishýge májbúrleı almaıdy» dep aıtqan bolatyn.
Eýropa parlamenti — EO-nyń zań shyǵarýshy organdarynyń biri. Zań jobalaryna engiziletin túzetýler negizinen Brıýsseldegi komıtetterde sheshiledi, al plenarlyq otyrystar negizinen Frantsııanyń Strasbýrg qalasynda ótedi. Eýroparlament depýtattarynyń kúndelikti tólemaqysy otyrysqa tikeleı qatysýmen baılanysty.
Eske sala keteıik, Eýroparlamentte Izraıl týyn edenge tastaǵan depýtatqa shara qoldanylmaq.
