Eýropa parlamentinde Ýrsýla fon der Lıaıenge senimsizdik votýmy protsedýrasy bastaldy

ASTANA. KAZINFORM – Rýmynııalyq depýtat George Pıperea Erokomıssııa prezıdenti Ýrsýla fon der Lıaıenge senimsizdik votýmyn qaraý bastamasyn kóterdi.

Eýropalyq BAQ ókilderiniń jazýynsha, otstavka týraly sheshim qabyldana qoımaıdy, degenmen de osy máseleniń kóterilip otyrǵanynyń ózi Ýrsýla fon der Lıaıenniń abyroıyna nuqsan keltiredi, dep habarlaıy Kazinform agenttiginiń menshikti tilshisi.

Eýroparlament múshesi, eń shetki solshyl kúshterdiń ókili G.Pıperea áriptesterinen «Pfizer» kompanııasynyń basshysy Albert Býrlomen jazysqan mátindik habarlamalardy taǵy bir zerdeleýdi surap otyr. Bul hattar 2021 jyly pandemııa kezinde COVID-19 vaktsınalaryn satyp alýmen baılanysty.

G.Pıperea depýtattardyń qoldarynyń eń tómengi shegin (70 depýtat) jınaǵan. Bul Eýrokomıssııa tóraǵasyn qyzmetinen ketirýge qajetti jalpy daýystyń (720) úshten birinen az.

Eger daýys berý júzege asyrylyp, Eýroparlament depýtattarynyń úshten ekisi daýys berse, onda Eýrokomıssııa túgeldeı ketedi jáne uıymǵa múshe ár memleketten bir-bir komıssardan taǵaıyndaı otyryp, jańa quram bekitiledi. Bul - óte kúrdeli protsess.

Óziniń áleýmettik jelilerdegi paraqshalarynda G.Pıperea basty mindet – Eýrokomıssııanyń jumysynyń ashyqtyǵyn qamtamasyz etý ekenin aıtady.

Jýyrda ǵana Ý.Lıaıenge «jasyl baǵytty» álsiretý úshin ásire solshyldarmen yntymaqtasty dep aıyp taqqan jetekshi tsentrıstik kúshterdiń ózi G.Pıpereanyń bastamasyn qoldaıyn dep otyrǵan joq.

Naqtyraq aıtqanda Ý.Lıaıenniń saıası kúshi sanalatyn Eýropa halyq partııasy (EHP), sondaı-aq S&D tobyndaǵy sotsıalıster men «Eýropany jańǵyrtamyz» (Renew Europe) tobynyń lıberaldary votýmǵa qarsy daýys beretinin málimdedi.

«Jasyldardyń» ókilderi de ásire ońshyldardan shyqqan bastamany qoldaǵysy joq.

Sotsıalıster tobynyń tóraǵasy Irache Garsııa Peres «Biz ásire ońshyldardyń birde-bir bastamasyn qoldamaımyz» dep naqty aıtty.

Sarapshylar osylaısha otstavkaǵa jiberý múmkindiginiń tómendigine qaramastan máseleniń kóterilip, daýysqa salynýynyń ózi Ý.Lıaıenniń abyroıyna nuqsan keltiretin áreket ekenin aıtyp jatyr.

Osyǵan deıin Eýroparlamenttiń 15 múshesi sybaılas jemqorlyqqa qatysty tergeý aıasynda nazarǵa ilikkeni týraly jazdyq.