Eýropa órt pen qurǵaqshylyqtan japa shegip jatyr

NUR-SULTAN. QazAqparat - Grekııada ótken táýlikte kem degende 53 orman órti tirkeldi. Ystyq aýa raıy jańa órtterdi týdyrýy múmkin. Júzdegen adam qaýipti aımaqtardan evakýatsııalandy, dep habarlaıdy QazAqparat Euronews-ke silteme jasap.

Órt sóndirýshiler eldiń shalǵaı aýdandarynda, Lesbostyń ońtústigindegi Dadııa ulttyq saıabaǵynda jáne Batys Makedonııa aımaǵyndaǵy órtpen arpalysyp jatyr.

Tabıǵı apat bolǵan aýdandarǵa Úkimet músheleri keldi.

«Ári qaraı biz órttiń ońtústik-batys shetine baryp, jumys nátıjesin baqylaımyz, órttiń taralýyn toqtata alatyn múmkindikterdi qarastyramyz», - dedi klımat daǵdarysy jáne azamattyq qorǵanys mınıstri Hrıstos Stılıanıdıs.

Ispanııanyń Tenerıfe aralynda beısenbi kúni bolǵan úlken órtten keıin 600-den astam adam evakýatsııalandy.

Ispanııada sońǵy jyldary órt saldarynan 140 gektardan astam tabıǵı kóshetter men aýylsharýashylyq alqaptary zardap shekken.

Aptap ystyq pen qurǵaqshylyq saldarynan týyndaǵan qaýipti jaǵdaı Eýropanyń ońtústiginde ǵana emes.

Chehııanyń soltústiginde, Dechın qalasynyń mańyndaǵy tabıǵı parkiniń aýmaǵynda da orman órti shyqty.

Aldyn ala málimet boıynsha, búkil Eýropada órttiń shyǵýyna adam faktory sebep bolyp otyr.