Eýropa odaǵynyń sanktsııalar jónindegi ókili Qazaqstanǵa kelý sebebin aıtty
ASTANA. KAZINFORM — Eýropalyq odaqtyń sanktsııalar jónindegi arnaıy ókili Devıd O’Sallıvan Astanaǵa saparynyń qorytyndysy boıynsha ótken baspasóz máslıhatynda Qazaqstan EO úshin mańyzdy basym áriptes ekenin málimdedi.
— Men úshin Qazaqstanda bolý — úlken ǵanıbet. Bul meniń besinshi saparym. Qazaqstanmen yntymaqtastyǵymyz ben ózara is-qımylymyz qarqyndy damyp keledi jáne joǵary deńgeıde. Qazaqstan Eýropalyq odaq úshin mańyzy basym áriptes sanalady. Bizdiń taýar aınalymymyz jyl saıyn 45 mıllıard eýroǵa jetedi. Al Eýropa odaǵy — Qazaqstannyń eń iri saýda seriktesi jáne negizgi ınvestıtsııa kózi, — dep atap ótti Devıd O’Sallıvan Astanada ótken baspasóz máslıhatynda.
Arnaıy ókildiń aıtýynsha, ózara is-qımyl Keńeıtilgen áriptestik jáne yntymaqtastyq týraly kelisim aıasynda júrgizilip keledi. Bul qujat baılanystardy odan ári nyǵaıtýdyń mańyzdy quraly bolyp otyr.
Qazirgi ýaqytta taraptar vızalyq rásimderdi jeńildetý jáne readmıssııa týraly kelisimder boıynsha kelissóz júrgizip jatyr.
— Búgingi saparym Qazaqstan Úkimetimen dıalog aıasynda ótip jatyr. Biz bul dıalogty sanktsııalardy aınalyp ótýdiń aldyn alýǵa negizdeımiz. Sondaı-aq qarjy júıelerine qatysty máseleler talqylanýda. Árıne, jumys eshqashan aıaqtalmaıdy, bizdi áli de kóp jumys kútip tur, — dep tolyqtyrdy EO-nyń arnaıy ókili.
Buǵan deıin Devıd O’Sallıvan Eýropalyq odaq Qazaqstan munaıynyń eksportyna kedergi keltirmeıtinin aıtqan edi.
