Eýropa odaǵynyń kóshbasshylary Dýblınde JI máselesin alǵash ret talqylady
ASTANA. KAZINFORM — Juma kúni Irlandııa astanasynda Eýropa odaǵy elderiniń memleket jáne úkimet basshylary JI máselesin talqylaýǵa arnalǵan beıresmı kezdesýge jınaldy. Bul – EO kóshbasshylarynyń jańa tehnologııalar taqyrybyn alǵash ret joǵary deńgeıde talqylaýy, dep habarlaıdy Kazinform agenttiginiń menshikti tilshisi.
Kezdesýdi Irlandııa Premer-mınıstri Mıhol Martın qabyldap, oǵan Eýropalyq keńes prezıdenti Antonıý Koshta tóraǵalyq etip otyr. Basqosý Dublin Convention Centre ortalyǵynda ótti.
Aıta keteıik, buǵan deıin, 12 qarashada Dýblınde Eýropalyq saıası qoǵamdastyqtyń toǵyzynshy sammıti ótken bolatyn.
3 qarashadaǵy shaqyrý hatynda Antonıý Koshta 2026 jyl Eýropa odaǵynda «Básekege qabiletti jyl» dep jarııalanǵanyn atap ótti. Al naýryzdaǵy sammıtte kóshbasshylar bolashaq tehnologııalaryna ınvestıtsııa salyp, ınnovatsııalardy jedeldetýge kelisken edi. JI-diń qarqyndy damýyn eskere otyryp, ol bul taqyrypty joǵary deńgeıde alǵash ret arnaıy talqylaýdy usyndy.
Jıyn eki bólimnen turady. Alǵashqy bólimde Eýropa odaǵy elderiniń basshylary ekonomıkalyq básekelestik pen «JI salasyndaǵy egemendik» máselelerin talqylady. Bul taqyrypta Frantsııanyń Mistral AI kompanııasynyń negizin qalaýshy ári bas dırektory Artýr Mensh baıandama jasady.
Talqylaý barysynda JI salasyndaǵy jahandyq qun tizbeginde Eýropanyń alatyn ornyna basa nazar aýdaryldy. Atap aıtqanda, esepteý qýatyn arttyrý, derekterdi qashyqtan saqtaý men óńdeý qyzmetterin damytý, JI modelderi men chıpter óndirisin jolǵa qoıý, syrtqy táýeldilikti azaıtý jáne memlekettik-jekemenshik ınvestıtsııalardy tartý máseleleri qaraldy.
Ekinshi bólimde JI-diń qoǵamǵa, qaýipsizdikke jáne qoǵamdyq senimge áseri talqylandy. Bul bólimde Nobel syılyǵynyń laýreaty Djeffrı Hınton sóz sóıleıdi. Sondaı-aq JI-diń eńbek naryǵyna, negizgi quqyqtarǵa, demokratııalyq úderisterge jáne kıberqaýipsizdikke yqpaly, sondaı-aq ozyq JI tehnologııalaryn halyqaralyq deńgeıde retteý máseleleri sóz boldy.
Jıyn sońynda 27 eldiń basshylary túski as kezinde bas qosyp, aldaǵy qadamdar jóninde pikir almasady. Kezdesý beıresmı sıpatta ótetindikten, resmı qorytyndy qabyldanbaıdy.
Buǵan deıin Eýroodaqta 2 tamyzdan bastap JI-ge qatysty jańa erejeler kúshine enetini habarlanǵan bolatyn.