Eýropa odaǵynda gaz qory sońǵy 15 jyldaǵy eń tómengi deńgeıge tústi
ASTANA. KAZINFORM — Eýropa komıssııa tóraǵasy Ýrsýla fon der Lıaıen aldaǵy qysta gaz tapshylyǵy týyndaýy múmkin degen qaýipke baılanysty Eýropa odaǵy elderiniń kóshbasshylaryna ortaq strategııalyq gaz qoryn qurý máselesin qarastyrýdy usyndy, dep habarlaıdy Kazinform agenttiginiń menshikti tilshisi.
POLITICO basylymynyń málimetinshe, bul bastama beısenbi kúni Brıýsselde ótken Eýropa elderi kóshbasshylarynyń sammıtinde kóterildi.
Eýropadaǵy gaz qoımalaryn kommertsııalyq kompanııalar jyl boıy toltyryp otyrady. Alaıda bıyl gaz qory rekordtyq tómen deńgeıge túsken. Irandaǵy soǵys pen Ormýz buǵazy arqyly gaz tasymalynyń buzylýy jazda baǵanyń sharyqtaýyna ákelip, kompanııalardyń gaz qoryn tolyqtyrýǵa degen yntasyn tómendetken.
EO-nyń joǵary laýazymdy sheneýniginiń aıtýynsha, bul usynys — gaz jetkizý qaýipsizdigin nyǵaıtýǵa baǵyttalǵan uzaq merzimdi shara. Ol munaı men munaı ónimderiniń strategııalyq qoryn jınaqtaý tájirıbesine negizdelýi múmkin. Biraq ony júzege asyrý tetigi ázirge naqty aıqyndalmaǵan.
EO-nyń gaz júıesin reformalaý jospary qarasha aıynda jarııalanady. Qujatta kompanııalardyń daǵdarys jaǵdaıynda áreket etý múmkindigin arttyrý sharalary qarastyrylǵan. Alaıda qujatta úkimetterge naryq jaǵdaıyna qaramastan, gaz qoryn mindetti túrde belgili bir deńgeıde ustap turý talaby engizilmegen.
Eýropa odaǵynyń jekelegen elderi gaz qoryn tolyqtyrýǵa ózderi kiristi. Nıderland gaz satyp alýǵa sýbsıdııa bólip, bul maqsatqa 1 mıllıard eýroǵa jýyq qarjy jumsady. Al Germanııa ulttyq strategııalyq gaz qoryn qurý múmkindigin qarastyryp jatyr.
Eýropalyq komıssııanyń energııa resýrstaryn birlesip satyp alýdyń ortaq júıesin qurý týraly usynysy EO elderi basshylarynyń tarapynan aıtarlyqtaı qoldaý tappaǵan. Bul týraly eki dıplomat habarlady.
Energetıkalyq ekonomıka jáne qarjylyq taldaý ınstıtýtynyń (IEEFA) sarapshylarynyń málimetinshe, qazan aıynyń ortasynda Eýropadaǵy gaz qoımalarynyń 72-74 paıyzy ǵana toltyrylǵan. Bul — 2011 jyldan bergi osy kezeńdegi eń tómengi kórsetkish. Qys qatty bolyp, suıytylǵan tabıǵı gaz jetkizý shektelse, Eýropada 14 mlrd tekshe metrge deıin gaz tapshylyǵy týyndaýy múmkin. Bul jalpy gaz tutyný kóleminiń shamamen 7 paıyzyna teń.
Buǵan deıin EO kóshbasshylary Brıýsselde mańyzdy máselelerdi talqylap jatqanyn habarlaǵan bolatynbyz.
