Eýropa men Túrkııadan ákelinedi: Almatyda qashan jergilikti aǵashtar otyrǵyzyla bastaıdy
ALMATY. KAZINFORM — Almatyda jyl saıyn 1 mıllıonnan kóshetke suranys bar.
Almatyny gúlge kómkerilip, jasyl jelegi jaıqalǵan kóshelersiz elestetý múmkin emes. Qala aýmaǵyn abattandyryp, kórkeıtý úshin jyl saıyn myńdaǵan kóshet otyrǵyzylady. Biraq ishki suranysty otandyq sharýashylyqtar tolyq qamtamasyz ete almaı otyr. Sondyqtan Almaty ákimdigi tálimbaq qurý máselesin qolǵa alǵan.
— Qazirgi tańda Almatyda arnaıy tálimbaqtyń bolmaýy syrtqy jetkizýshilerge táýeldilikti kúsheıtip, kóshetterdiń baǵasy men jersiný sapasyna áser etip otyr. Sondyqtan ózindik tálimbaq bazasyn qalyptastyrý kógaldandyrý salasyn turaqtandyryp, qalalyq ortanyń sapasyn arttyrýdaǵy mańyzdy strategııalyq qadam, — dep habarlady ákimdikten.
Kazinform agenttiginiń saýalyna jaýap bergen Almaty qalasynyń Ekologııa jáne qorshaǵan orta basqarmasy bıyl megapolıste otyrǵyzylǵan iri kóshetter Eýropa elderinen jáne Túrkııanyń pıtomnıkterinen jetkizilgenin atap ótti. Al shaǵyn kóshetter men sándik butalardyń negizgi bóligi eldegi jergilikti pıtomnıkterde ósirilgen.
— Al qalany maýsymdyq gúldendirý úshin paıdalanylatyn gúlderdiń bir bóligi Túrkııa pıtomnıkterinen jetkizilse, qalǵan bóligi jergilikti pıtomnıkterde ósirilip, Almaty qalasyn kógaldandyrý jumystary barysynda paıdalanylyp jatyr, — dep jaýap berdi vedomstvodan.
Ekologııa jáne qorshaǵan orta basqarmasynyń málimetinshe, qazirgi Almatyda turaqty qalalyq tálimbaq qurý jobasy áli de talqylaý kezeńinde. Jobany iske asyrý úshin ınvestorlar men demeýshilik resýrstardy tartý baǵytynda kelissózder júrgizilip jatyr.
— Bolashaq tálimbaqta Almaty qalasynyń klımattyq jaǵdaıyna beıimdelgen japyraqty jáne qylqan japyraqty aǵashtar, sándik butalar men kópjyldyq gúlder ósirý josparlanyp otyr. Bul qalany buta jáne kóshettermen qamtamasyz etýge, syrtqy jetkizýshilerge táýeldilikti azaıtýǵa jáne jasyl jelekterdi kezeń-kezeńimen jańartý jumystaryn tıimdi júrgizýge múmkindik beredi, — delingen basqarma jaýabynda.
Vedomstvo ókilderi jobany qarjylandyrý úshin ártúrli tetikter qarastyrylyp jatqanyn, onyń ishinde ınvestorlar men demeýshilik qarajat tartý máselesi bar ekenin atap ótti.
Eske salaıyq, byltyr megapolıste shamamen 370 myń buta jáne 5 myńnan astam iri kólemdi aǵash otyrǵyzyldy. Al bıyl olardyń sany aıtarlyqtaı kóbeımek. 2026 jylǵy jospar boıynsha 500 000 buta men 7 200 iri aǵash egilýi tıis. Odan bólek kesilgen aǵashtardyń ornyna 40 myń kóshet otyrǵyzý josparlanǵan.
Buǵan deıin Almatynyń Medeý aýdanynda kóshedegi aǵashtardy zańsyz kesý deregi anyqtaldy.
