Eýropa men Qytaıǵa jol: Qazaqstan men Pákistan taýar aınalymyn 1 mlrd dollarǵa jetkizbek
ISLAMABAD. KAZINFORM — QR Premer-Mınıstriniń orynbasary — Syrtqy ister mınıstri Murat Nurtileý Pákistandaǵy resmı saparynda eldegi iri kompanııalardyń basshylyǵymen kezdesý ótkizdi. Ásirese taraptar saýda, logıstıka, qarjy, IT, aýylsharýashylyǵy, azyq-túlik salalaryna basa kóńil bólip otyr.
Máselen, qazaqstandyq tarap kezdesý ótkizgen úsh iri kompanııanyń ekeýi (National Logistics Corporation, TCS Logistics) logıstıkamen aınalysady.
Jyl basynan beri Qazaqstan men Pákistan arasyndaǵy taýar aınalymy 2,5 esege ósip, 86 mln AQSh dollaryna jetken. Qazir Qazaqstannan Pákistanǵa kókónister, burshaq tuqymdastar, pııaz, sarymsaq, suly, qaraqumyq, tary jáne basqa dándi daqyldar, qara metall buıymdary eksporttalady. Al Pákistannan — tsıtrýs jemisteri, dárilik zattar, erler men áıelder kıimi, azyq-túlikter, kartop jetkiziledi.
Eki el arasyndaǵy taýar aınalymyn 1 mlrd dollardan da asyrýǵa áleýetimiz bar deıdi qos tarap.
— Bizdiń negizgi maqsatymyz — taýar aınalymyn 1 mıllıard dollarǵa jetkizý. Saýdadaǵy basty másele — kólik joldary men dálizder ekeni belgili. Qazaqstan qazirgi tańda iri transporttyq logıstıkalyq hab bolyp, tek Qazaqstanǵa emes, kórshiles elderge de taýar tasýǵa múmkinshilik beredi. Mysaly TCS Logistics Aýǵanstan arqyly Ózbekstanǵa taýar ákeledi. Ony Saryaǵashta poıyzǵa tıep ákete alamyz. Ásirese maýsymaralyq kezde erte pisetin kartopty, jemis-jıdekti, basqa da azyq-túlik túrlerin Pákistannan alyp otyrmyz. Pákistandyq seriktesterge Almatyda saýda-kóterme ortalyǵyn ashýdy usyndyq. Atap ótkenimdeı, Qazaqstan — Pákistan úshin úlken múmkindik. Olar tek bizge emes, Qytaıǵa, Reseıge, EAEO elderine taýar jetkize alady. Al Pákistan bizge «Ońtústik-Soltústik dálizi» jobasyn engizýde seriktes bolmaq, — dedi QR Saýda jáne ıntegratsııa mınıstri Arman Shaqqalıev agenttikke bergen suhbatynda.
Pákistandyq kásipkerler de Qazaqstannyń Ortalyq Azııaǵa, Reseıge, Eýropaǵa jáne Qytaıǵa jol ashatyn mańyzdy qaqpa ekenin atap ótti. Óz kezeginde Pákistan Afrıkamen, Taıaý Shyǵys pen Ońtústik-Shyǵys Azııamen jerústi saýdasyna jol ashady.
— Qazaqstan men Pákistannyń bolashaqta bıznesti damytýda úlken múmkindikteri bar. Dúnıejúzindegi geosaıası ózgerister men saýda úlgileriniń almasýy bıznester úshin, ásirese meniń jumys isteıtin logıstıka salasynda jańa saýda joldaryn, jańa seriktestikterdi ornatýǵa úlken múmkindik týǵyzyp otyr. Qazaqstan men Pákistan ekonomıkasy barlyq salada bir-birin tolyqtyrady. Mysaly aýyl sharýashylyǵynda sizderdiń jerlerińiz keń bolǵanymen, egis maýsymy qysqa, sondyqtan aýyl sharýashylyǵy ónimderińizdiń kólemi azdaý. Al Pákistannyń aýyl sharýashylyǵy ónimderi áldeqaıda mol. Biz kóptegen pákistandyq jemis-jıdekter men kókónisterdi sizderdiń naryqtaryńyzǵa jetkize alamyz, bul sizderdiń sýpermarketterińizdi, jemis-kókónis dúkenderińizdi mol ónimmen tolyqtyrady, — dedi TCS Logistic kompanııasynyń basshysy H. Avan.
Qazaqstandyq delegatsııa kezdesken iri pákistandyq korporatsııa Fauji Foundation — energetıka, munaı gaz tyńaıtqyshtar boıynsha 29 enshiles kompanııanyń ıesi. Olar Qazaqstanǵa 1,1 mlrd dollar ınvestıtsııa salýǵa daıyn ekenin bildirdi.
— Biz eldegi eń iri bıznes-konglomerattardyń birimiz, búgin ózimizdiń alýan túrli baǵyttarymyzdy Qazaqstan basshylyǵyna tanystyrdyq, Qazaqstan kompanııalarymen yntymaqtasa alatyn naqty salalardy anyqtadyq. Máselen munaı jáne gaz, tyńaıtqysh óndirý boıynsha kompanııalarymyz yntymaqtastyqty bastap ketken. Jaqynda bizdegi Askari Bank bıznes tólemderi úshin qazaqstandyq bankpen seriktestik ornatýdy kózdep otyr. Qazaqstandyq delegatsııa suhbatqa óte ashyq boldy, biz búgin azyq-túlik, maınıng, tsıfrlandyrý, áriptestikti jaqsartý boıynsha pikir almastyq, — deıdi Fauji Foundation ákimshiliginiń komıtet hatshysy Irfan Han.
Aıta keteıik, Qazaqstanda pákistandyq kapıtaldyń qatysýymen 240-tan astam kásiporyn jumys isteıdi. Almatyda Pákistannyń saýda ókildigi ornalasqan.
Eske sala ketsek, QR Premer-Mınıstriniń orynbasary — Syrtqy ister mınıstri Murat Nurtileý Pákistan astanasy Islamabad qalasyna resmı saparmen bardy. Bul saparda Qazaqstan mınıstriniń Pákistannyń prezıdenti Asıf Alı Zardarımen, premer-mınıstri — Shahbaz Sharıfpen, syrtqy ister mınıstri –– Muhammad Ysqaq Darmen kezdesýi josparlanǵan.