Eýropa men Qazaqstan arasyndaǵy ýaqyt aıyrmashylyǵy qysqardy

ASTANA. KAZINFORM - Búgin túnde Belgııa jáne basqa da elderdiń turǵyndary saǵattaryn bir saǵat alǵa jyljytty, dep habarlaıdy Kazinform agenttiginiń menshikti tilshisi.

Ortalyq Eýropa ýaqyty (CET) men Ortalyq Eýropa jazǵy ýaqytyna (CEST) aýysý nátıjesinde búgingi kún (30 naýryz) 24 saǵattyń ornyna 23 saǵatqa ǵana sozyldy.

Belgııada naýryz aıynyń sońynda jazǵy ýaqytqa kóshý júıesi 1977 jyly engizilgen. Bul 1974 jylǵy munaı daǵdarysynan keıin oryn alǵan jáne onyń negizgi maqsaty – energııany únemdeý boldy.

Kóptegen belgııalyq jazǵy ýaqytty unatady, óıtkeni uzaq ýaqyt boıy jaryq bolady. Alaıda saǵat aýystyrýǵa qarsylyq bildiretinder árdaıym bolǵan.

Olardyń aıtýynsha, jazǵy ýaqyt energııa tutynýdy azaıtpaıdy. Sonymen qatar, jolaýshylar tańerteńgi qarbalas ýaqytta qarańǵyda jumysqa barady, al keshke – qatty ystyqta úılerine qaıtady. Sondaı-aq, qarsy tarap jazǵy ýaqyt adamnyń bıologııalyq yrǵaǵyn buzady dep esepteıdi.

Degenmen, Belgııa men basqa da EO elderiniń úkimetteri jazǵy ýaqytqa kóshýdi toqtatý máselesin qarastyrmaıdy.

Saǵatty aýystyrǵannan keıin Brıýssel men Astana arasyndaǵy ýaqyt aıyrmashylyǵy úsh saǵatqa qysqardy.

Buǵan deıin Qazaqstan Úkimetiniń ókilderi saǵatty aýystyrý eldiń energetıka salasyna aıtarlyqtaı áser etpegenin málimdegen.

Sonymen qatar Prezıdent Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda biryńǵaı ýaqyt beldeýine kóshý máselesine pikir bildirgen edi.