Eýropa men Azııada gaz qaıtadan qymbattaı bastady

ASTANA. KAZINFORM — Azııadaǵy suıytylǵan tabıǵı gazdyń baǵasy aqpan aıynyń sońynan bastap 40 paıyzǵa kóterilip, bıylǵy eń joǵary kórsetkish tirkelip otyr. Búginde ár myń tekshe metri úshin 400 dollarǵa baǵalanǵan.

Osyǵan baılanysty uzaqmerzimdi kelisimshartpen jumys istemeıtin kóptegen suıytylǵan tabıǵı gazdyń jetkizýshileri Azııa naryǵyna basymdyq bere bastaǵan. Olar taýardy eń áýeli Japonııa, Ońtústik Koreıa jáne Qytaıǵa jóneltip otyr.

Taıaý Shyǵystaǵy shıelenis jaǵdaıǵa jáne odan týyndaıtyn logıstıkalyq qıyndyqtarǵa baılanysty baǵa ósip jatqanyn atap ótken jón.

Rystad Energy sarapshylarynyń pikirinshe, eger qaqtyǵys odan ári shıelenisip, Iran Ormýz buǵazyn jaýyp tastasa, onda gaz baǵasy ár myń tekshe metrine 3600 dollardan asýy múmkin.

Ázirge mundaı stsenarııdiń yqtımaldyǵy tómen.

Aıta keteıik, álemdegi barlyq suıytylǵan tabıǵı gazdyń jetkizýshileriniń saýdasynyń 20%-ǵa jýyǵy atalǵan buǵaz arqyly ótedi. 

Reseı úshin gazdyń álemdik baǵasynyń ósýi — qolaıly qubylys. 

Sebebi, ishki gaz tarıfteri álemdik baǵamen baılanysty emes, kóbine suıytylǵan tabıǵı gaz eksporttalady.

Dese de, Azııadaǵy baǵanyń kóterilýi Eýropany eleń etkizdi. Qazir Eýropadaǵy gaz baǵasy — ár myń tekshe metrine 350 dollar.

Bul — aǵymdaǵy jyldyń aqpan-naýryz aılarymen salystyrǵanda bir jarym-eki esege joǵary.

Sarapshylar qazirgi ýaqytta naryqta suıytylǵan tabıǵı gazdyń tapshylyǵy baıqalmaıtynyn, sondyqtan Eýropa men Azııa arasyndaǵy ónimniń qoljetimdi kólemi úshin kúrestiń shıelenisýi ekitalaı ekenin alǵa tartyp otyr.