Eýropa men Azııa arasyndaǵy tranzıtti jandandyrý úshin Transkaspıı baǵdaryn damytý mańyzdy – QR Prezıdenti

SIANЬ. QazAqparat - Sıan qalasynda ótken qazaq-qytaı ınvestıtsııalyq dóńgelek ústeli kezinde Prezıdent Qasym-Jomart Toqaev Eýropa men Azııa arasyndaǵy tranzıtti jandandyrý úshin Transkaspıı baǵdaryn damytý mańyzdy ekenin málimdedi, dep habarlaıdy QazAqparat.

Jıynda Qasym-Jomart Toqaev qurlyqtaǵy kólik dálizderin damytý máselesin de qozǵady. Qytaı Batys Eýrazııanyń aýqymdy naryqtaryna Qazaqstan aýmaǵy arqyly shyǵa alatynyna ınvestorlardyń nazaryn aýdardy.

«Mundaı tasymal joly óte utymdy ekeni sózsiz. Biz Sıan qalasyndaǵy qurǵaq portta Qazaqstannyń logıstıka ortalyǵyn salýǵa basa mán berip otyrmyz. Ortalyq Azııaǵa, Eýropaǵa, Túrkııa men Iranǵa konteıner poıyzdaryn tikeleı jóneltý isinde osy ortalyq negizgi hab bolady. Biz Qytaıǵa qaraı «Aıagóz – Baqty» temir jolyn iske qosýdy josparlap otyrmyz. «Dostyq – Moıynty» arasyndaǵy temir jolǵa kúrdeli jóndeý júrgiziledi. Sonda temir jol arqyly jyl saıyn 20 mıllıon tonnaǵa deıin júk tasymaldaýǵa múmkindik týady. Eýropa men Azııa arasyndaǵy tranzıtti jandandyrý úshin Transkaspıı baǵdaryn damytý mańyzdy dep sanaımyn. Bul baǵyttyń bolashaǵy zor», – dedi Memleket basshysy.

Buǵan deıin Memleket basshysynyń qazaq-qytaı ınvestıtsııalyq dóńgelek ústeline qatysqanyn jazǵan bolatynbyz.

Prezıdenttiń QHR-ǵa sapary aıasynda quny 22 mlrd dollar bolatyn 47 qujatqa qol qoıyldy