Eýropa men Amerıka: mıllıarderler sany qaı elde jyldam ósip jatyr
ASTANA. KAZINFORM – Álemdegi mıllıarderler sanynyń úlesinde Eýropanyń azdaǵan ósimi kútiledi, al Amerıkada bul kórsetkish sál tómendeýi múmkin, degenmen jalpy baılyq kólemi arta beredi. Euronews 2026–2031 jyldar aralyǵyndaǵy mıllıarderlerdiń kóbeıý úrdisin taldaǵan.
Dollarlyq mıllıarderler sany álemde turaqty túrde ósip keledi jáne baıaýlaý belgileri baıqalmaıdy. Dúnıejúzinde olardyń sany 2021 jylǵy 2 723-ten 2026 jyly 3 110-ǵa deıin ósken, ıaǵnı bes jylda 14 paıyzǵa artqan.
Bul qarqyn aldaǵy ýaqytta odan ári kúsheıedi dep boljanyp otyr. Knight Frank Wealth Report 2026 esebine sáıkes, kelesi bes jylda mıllıarderler sany 26 paıyzǵa ósip, 2031 jyly 3 915 adamǵa jetedi.
Bul ósimniń negizgi draıverleriniń biri Eýropa bolady dep kútilýde. Boljam boıynsha, Eýropadaǵy mıllıarderler sany 2026 jylǵy 780 adamnan 2031 jyly 994 adamǵa deıin ósedi, bul 27 paıyzdyq ósimdi bildiredi.
— Biz qazirgi zaman tarıhyndaǵy álemdik baılyqtyń bólinýindegi eń iri ózgeristerdiń birine kýá bolyp otyrmyz, — dedi Lıam Beılı.
Biraq mıllıarderler sany eń jyldam qaı elderde ósedi? Eýropanyń bul ósimi Amerıka elderimen salystyrǵanda qalaı kórinedi?
Esepte eń jyldam ósim kútiletin 20 el kórsetilgen. Olardyń segizi — Eýropa elderi, olardyń ishinde Soltústik Eýropa memleketteri basym.
Osy tizimde birinshi orynda Saýd Arabııasy tur: onda mıllıarderler sany 183 paıyzǵa ósip, 23-ten 65-ke jetedi.
Eýropadaǵy ósimniń kóshbasshysy — Polsha. Onda mıllıarderler sany 13-ten 29 adamǵa deıin, ıaǵnı 123 paıyzǵa artady.
Ekinshi orynda Shvetsııa tur: onda ósim 81 paıyz bolyp, 32-den 58 adamǵa deıin jetedi. Odan keıin Danııa keledi, onda kórsetkish 75 paıyzǵa artyp, 12-den 21 adamǵa deıin ósedi.
Norvegııa Soltústik Eýropanyń yqpalyn kúsheıtedi: onda mıllıarderler sany 17-den 26-ǵa deıin (53 paıyz) ósedi. Eýropada eń jyldam ósetin tórt eldiń úsheýi Soltústik Eýropaǵa tıesili.
Aýstrııa elinde ósim 50 paıyz bolyp, 12-den 18 adamǵa jetedi. Ispanııada bul kórsetkish 40 paıyzǵa artyp, 53 adamǵa deıin ósedi. Italııada mıllıarderler sany 61-den 82 adamǵa deıin kóbeıedi.
Túrkııa úshin 31 paıyzdyq ósim boljanyp otyr: 35-ten 46 adamǵa deıin.
Reıtıng bes jyldyq ósim qarqyny boıynsha jasalǵan. Sondyqtan onda Ulybrıtanııa, Germanııa jáne Frantsııa sııaqty iri ekonomıkalar tolyq kórsetilmegen. Mysaly, Germanııa 2025 jyly Eýropada 171 mıllıardermen kósh bastaǵan.
Eger sol 20 eldi 2031 jylǵy jalpy mıllıarderler sany boıynsha qarastyrsaq, birinshi orynǵa Úndistan shyǵady — 313 mıllıarder. Odan keıin Aýstralııa jáne Sıngapýr — árqaısysynda 85-ten.
Eýropa elderiniń ishinde Italııa 82 mıllıardermen kósh bastap tur. Shvetsııa 58-ge jetip, Ispanııany (53) basyp ozady.
Lıam Beılı atap ótkendeı, geosaıası turaqsyzdyq pen ınflıatsııaǵa qaramastan, jeke kapıtal óte tózimdi ekenin kórsetip otyr. Onyń aıtýynsha, sońǵy derekter álem boıynsha baılyq jınaýdyń qurylymdyq túrde jedeldegenin dáleldeıdi.
2031 jylǵa qaraı Eýropada mıllıarderler sany 780-nen 994-ke deıin ósip, 1000 adamdyq mejege jaqyndaıdy. Onyń álemdik úlesi 25,4 paıyzǵa deıin artady.
Soltústik Amerıka aımaǵynda da mıllıarderler sany 995-ten 1 089-ǵa deıin ósedi, biraq onyń úlesi 31 paıyzdan 27,8 paıyzǵa deıin tómendeıdi. Bul — álemde úlesi azaıatyn jalǵyz óńir.
— Shyn máninde, kúrdelene túsken jahandyq ekonomıkalyq jaǵdaıda baılyqtyń shoǵyrlanýy údeı tústi. Óte baı adamdar áldeqaıda mobıldi bola bastady, biraq olardyń ınvestıtsııa jasaıtyn jáne otbasyn ornalastyratyn senimdi naryqtar sany azaıyp barady, — dedi Rorı Penn.
Qaýipsizdik jáne zań ústemdigi
Esepte eń aýqatty otbasylar aktıvterin birneshe ortalyqqa bólip ornalastyratyny aıtylǵan — ádette Amerıka, Eýropa jáne Azııa-Tynyq muhıty aımaqtarynda. Mundaı ártaraptandyrýdyń sebebi — qaýipsizdik pen zań ústemdigine degen qajettilik.
Aıta ketelik Germanııada baılyqqa salynatyn salyq 140 mlrd eýrodan asa tabys ákelýi múmkin.
