Eýropa Lıgasynyń matchynda «Aqtóbe» «Dınamodan» utyldy
ASTANA. 22 tamyz. QazAqparat - Qazaqstandyq "Aqtóbe" Eýropa Lıgasynyń pleı-off irikteý kezeńiniń birinshi matchynda kıevtik "Dınamony" qabyldady, dep habarlady Vesti.kz.
Kezdesýdiń alǵashqy mınýtynan-aq kıevtikter tarapynan kúshti shabýyl bastaldy. "Dınamolyqtar" shapshańyraq gol soǵýǵa qushyrlanǵany baıqalyp turdy. Jankúıerlerdiń qyzý qoldaýyna qaramastan, alań ıeleri "shashyrańqy" oınady. Osyny paıdalanǵan qonaqtar 16-mınýtta Vladımır Nıkıtenko komandasynyń sazaıyn berdi.
Qaqpalaryna gol jiberip alǵan aqtóbelikter esin jınap, qaýipti shabýyldaı bastady. Oıynnyń 37-shi mınýtynda aıyp doptardyń biri qaqpaǵa kirdi. Birinshi qanattan ushqan Geınrıhtiń doby Tremýlınniń tizesine tıip qaqpaǵa dóp tústi - 1:1.
Oıynnyń ekinshi jartysyna "Dınamo" bar kúshin salǵandaı. 51-shi mınýtta Ideıe "Aqtóbeniń" aıyp dobyn tutyp alyp, Sıdelnıkovtiń janynan ótkizip jiberdi.
Ekinshi goldan keıin aqtóbelikterdiń unjyrǵalary túsip ketti. Bes mınýtten keıin Belanda "Dınamonyń " úshinshi golyn soqty.
66-mınýtta Arzýmanıannyń oń qanattan soqqan doby Haırýllınniń aıaǵyna tıdi, biraq Shovkovskıı qaırat kórsete almady - 2:3.
Matchtyn sońyna qaraı oıyn shıelenise tústi. Biraq oıynnyń esebi ózgermedi - 3:2. Jaýap match 29 tamyzda Kıevte ótedi.
