Eýropa lıgasynyń iriekteý kezeńindegi aqtóbelikter alǵashqy matchta syrt alańda Grýzııanyń «Torpedosymen» 1:1 esebimen teń tústi
ALMATY. 6 shilde. QazAqparat - Vladımır Mýhanov jattyqtyratyn «aqtóbelik» fýtbolshylar Eýropa lıgasynyń irikteý kezeńindegi alǵashqy kezdesýin Grýzııanyń Kýtaısı qalasyndaǵy Gıvı Kladze atyndaǵy stadıonda «Torpedo» komandasymen ótkizip 1:1 esebimen teń tústi.
Oıynnyń birinshi jartysynda aıaqdopshylar óz qarsylastarynyń qaqpasynan sańylaý taba almady. Tek úzilisten keıin Gııa Gegýchadze jattyqtyratyn alań ıeleri sapynan Nıkoloz Sabanadze (62 mınýt) jergilikti jankúıerlerdi bir jelpintken edi. Kezdesýdiń aıaq sheninde (82 mınýt) Marat Bıkmaev esepti teńestirip, jeńilisten qutqaryp qana qoımaı, óz komandasynyń qorjynyna alǵashqy upaıdy saldy. Qarymta kezdesý 12 shildede Aqtóbede ótedi.
Bas bapker V. Muqanov bul dúbirli doda qarsańynda: «Biz Eýropada burynǵydan da bıik belesterdi baǵyndyrǵymyz keledi. Sondaı-aq, Qazaqstan qorjynyna reıtıngtik upaılardy da qosý kerek. Barynsha kósilýge tyrysamyz», - degen edi. Kelesi kezeńniń taǵdyry endi aldaǵy beısenbidegi oıynda sheshiletin bolady.
