Eýropa lıgasynyń fınalynda «Atletıko» «Marseldi» oısyrata jeńdi
ASTANA. QazAqparat - ÝEFA Eýropa lıgasy fınalynda Ispanııanyń «Atletıko Madrıd» komandasy Frantsııanyń «Marselinen» basym tústi, dep habarlaıdy QazAqparat tilshisi.
Kóptegen fýtbol mamandary men jankúıerleri fınalda shartty túrde qonaq retinde oınaǵan «Atletıko» aıqyn basymdyqqa ıe bolady dep kútken edi. Alaıda óz elinde, Lıon qalasynda ótken oıynda marseldikter de aıanyp qalǵan joq. Dıego Sımeone shákirtteriniń berik qorǵanysyn ashý úshin qaıtse de gol soǵýy qajet ekenin jaqsy túsinetin edi. Sol sebepti alǵashqy mınýttardan bastap oıyn tizginin qolǵa alýǵa tyrysty. Biraq 21-mınýtta qarapaıym pas almasý kezinde qaqpashy men qorǵaýshylar bir-birin túsinbeı, madrıdtik fýtbolshylarǵa dopty «syılaı» saldy. Gabıdiń tamasha pasyn Antýan Grızmann golǵa aınaldyrdy.
Onyń ústine jaraqatynan tolyq aıyqpaǵan marseldikterdiń kapıtany Dmıtrı Paıeniń densaýlyǵy syr berip, 32-mınýtta alańdy tastap shyǵýǵa májbúr boldy. Onyń ornyna mundaı úlken matchtarda tájirıbesi az jas fýtbolshy M. Lopes shyqty.
Ekinshi taımda, 49-mınýtta Grızmann komandasynyń keremet uıymdastyrylǵan shabýylynan keıin dýblin toılady. Al oıyndaǵy sońǵy goldy 89-mınýtta Gabı soqty.
Osylaısha, «Atletıko» 2017/18 jylǵy maýsymdaǵyEýropa lıgasynyń jeńimpazy atandy.
