Eýropa lıgasy: Jartylaı fınalǵa shyqqan barlyq komanda anyqtaldy
NUR-SULTAN. QazAqparat - Búgin UEFA Eýropa lıgasy jartylaı fınalyna shyqqan barlyq komanda belgili boldy, dep habarlaıdy QazAqparat tilshisi.
Shırek fınalda joly túıisken «Shahter Donetsk» (Ýkraına) men «Bazel» (Shveıtsarııa) jubynda alǵashqy komandanyń tájirıbesi mol ekendigi belgili. Sondyqtan jankúıerler olardyń jarysty jalǵastyrý múmkindigi joǵary ekenine boljam jasady.
Rasynda, ýkraınalyq klýb fýtbolshylary basym oınady. Kezdesýdiń 2-mınýtynda «Shahter Donetsk» klýbynyń brazılııalyq shabýylshysy Jýnıor Moraes esep ashty. Al 22-mınýtta onyń komandalas áriptesi Taıson esepti ústemeleı tústi. Odan keıin 75-mınýtta Alan Patrık, penaltıden, 88-mınýtta Dodo gol soǵyp, qorytyndy esepti belgiledi. «Shahter Donetsk» qarsylasyn 4:1 esebimen tize búktirdi.
Taǵy bir kezdesý «Sevılıa» (Ispanııa) men «Výlvergempton Ýonderers» (Anglııa) komandalary arasynda ótti. Oıynnyń 13-mınýtynda aǵylshyn klýby esep ashatyn múmkindigi bolǵan. Olardyń qatarynan Raýl Hımenes penaltı tebýden múlt ketti. Oıynnyń 88-mınýtynda «Sevılıa» oıynshysy Lýkas Okampos soqqan jalǵyz gol kezdesý taǵdyryn sheshti. Osylaısha qarsylasyn 1:0 esebimen jeńgen «Sevılıa» jartylaı fınalǵa shyqty.
Esterińizge sala ketelik, 10 tamyzda «Manchester ıÝnaıted» (Anglııa) men «Inter» (Italııa) komandalary jartylaı fınalǵa joldama alǵan bolatyn.
Jartylaı fınalda «Inter» men «Shahter Donetsk», «Manchester ıÝnaıted» pen «Sevılıa» komandalary sheberlik baıqasady. Jeńimpaz bir ǵana oıyn nátıjesimen anyqtalady.
Endi jartylaı fınal oıyndary 16, 17 tamyz kúnderi Germanııanyń Dıýsseldorf, Keln qalalarynda ótkiziledi. Al fınal 21 tamyzda Keln qalasyndaǵy «Reın Energı» stadıonynda bolady.
