EÝROPA LIGASY: «Vılıarrealǵa» qarsy oınaıtyn «Astanany» qoldaý úshin jankúıerler elimizdiń barlyq óńirlerinen kelmekshi
ASTANA. QazAqparat - 21 tamyzda «Astana Arenada» ótetin ÝEFA-nyń Eýropa Lıgasynda «Astana» men ıspandyq «Vılıarreal» arasyndaǵy oıynnyń bıletterine degen suranys joǵary jáne olardy elimizdiń barlyq óńirleriniń jankúıerleri talap áketýde. Bul týraly bılet satýdy uıymdastyratyn «Meloman» jelisi habarlap otyr.
«Bıletter kassalarǵa tek keshe ǵana tústi, degenmen olardyń ótý jyldamdyǵy qazaqstandyqtardyń bul oıyndy asyǵa kútip júrgenin kórsetedi. Satyp alýshylar bıletterdi ózderine, otbasyna, keıbiri tipti matchty kórip, elimizdiń komandasyna jankúıer bolý úshin basqa qalalardan keletin dostaryna alyp jatqandaryn aıtady. «Astana» klýbynyń jetistikteri barsha qazaqstandyqtardy biriktire alǵany qandaı tamasha. Endi fýtbolshylarymyz jerge qaratpas degen úmittemiz», - deıdi Aıgúl esimdi «Meloman» jelisiniń kassıri.
Onyń aıtýynsha, bıletter satylymǵa túspeı jatyp-aq, elimizdiń túkpir-túkpirinen qońyraý shalýshylar kóbeıip, olar bılettiń qunyn, qashan satyla bastaıtynyn surastyrǵan.
Buryn habarlanǵandaı, «Astana» men «Vılıarreal» arasyndaǵy matchtyń bıletteri 4 kategorııaǵa bólingen. Olar 500-den 3 myń teńgege deıin turady.
Aıta keteıik, komandalardyń qarymta kezdesýi 28 tamyzda Ispanııada ótedi. Eger osy eki oıynnyń ortaq nátıjesi boıynsha qazaqstandyq komanda jeńiske jetse, ol eýrokýbok júldesiniń negizgi kestesine ótedi.
