Eýropa lıgasy: «Tobyl» syrt alańda «Pıýnıkke» jol berdi
ASTANA. QazAqparat - Búgin Armenııa astanasy - Erevan qalasynda fýtboldan Eýropa lıgasy ekinshi irikteý kezeńinde Qostanaıdyń «Tobyly» jergilikti «Pıýnık» komandasymen kezdesip, 0:1 esebimen jeńilip qaldy. Qos oıynnyń nátıjesi boıynsha «Tobyl» jarys jolynan shyǵyp qaldy, dep habarlaıdy QazAqparat tilshisi.
«Tobyl» eki kún buryn ǵana el birinshiliginde kezekti týr oıyndaryn ótkizdi. Almatyda «Qaıratpen» sheberlik baıqasqan qostanaılyq fýtbolshylar endi Eýropa lıgasynda baq synady. Árıne, mundaı jaǵdaıda oıynshylarǵa biraz qıyndyq týyndaýy múmkin. Soǵan qaramastan «Tobyl» atalmysh kezdesýge baryn saldy.
Aıta ketelik, Eýropa lıgasyna «Tobyl» joldamaǵa kezdeısoq qol jetkizdi. Birqatar talaptardy oryndamaǵany úshin Shymkenttiń «Ordabasy» klýby bul básekeden shet qaldy. Onyń ornyna «Tobyl» el namysyn qorǵaıtyn boldy.
Eýropa lıgasy alǵashqy irikteý kezeńinde qostanaılyq ujym sátti oıyn kórsetti. Grýzııanyń «Samtredıa» komandasyn aldymen syrt alańda 1:0 esebimen jeńip, óz alańynda olardan 2:0 esebimen basym tústi. Ekinshi irikteý kezeńindegi alǵashqy oıynda «Pıýnıkten» 2:1 esebimen aılasyn asyrdy. Endigi kezekte bizdiń ftbolshylar úshin syrt alańda qajetti nátıjege qol jetkizý mańyzdy edi. Alǵashqy mınýttan «Pıýnık» sapynda Dragoevıch, Grıgorıan, Avetısıan, Korıan, Trýsevıch, Voınov, Dmıtrıev, Aırapetıan, Kado, Ovsepıan, Jestokov jasyl alańǵa shyqsa, «Tobyl» quramynda Nepogodov, Kassaı, Mıroshnıchenko, Dmıtrenko, Kvekveskırı, Nurǵalıev, Kankava, Jýlpa, Nóserbaev, Bystrov, Fedın boldy.
Oıynnyń bastapqy kezeńinde «Tobyldyń» basymdyǵy baıqalyp turdy. Olar tezirek gol soǵyp alý múmkindigin izdedi. Onyń sebebi belgili. Syrt alańda soqqan gol komandaǵa qosymsha múmkindik beretini ras. Bul jaǵdaıda alań ıeleri kem degende úsh dop soǵýǵa tyrysady. Dese de birinshi kezeńde kózge kórinerlik shabýyl óristeı qoıǵan joq.
Ekinshi kezeńde «Pıýnık» oıynshylary belsendi qımylymen kózge tústi. «Tobyl» qaqpasy mańynda birneshe shabýyl uıymdastyryp úlgerdi. 61-mınýtta alań ıeleri sapynan Petros Avetısıan bizdiń qaqpaǵa soqqy baǵyttaǵan edi. Oǵan «Tobyl» qaqpashysy Dmıtrıı Nepogodov toıtarys bere bildi. Oıynnyń sońǵy 10-shy mınýty tartysty bola tústi. 82-mınýtta «Pıýnık» sapynan Mohamed Konate gol soǵyp, óz komandasyn alǵa shyǵardy. Bul - «Pıýnıkti» jarystyń kelesi satysyna shyǵýyna qolaıly esep. Endi «Tobyl» úshin shabýylǵa shyǵý mindeti alda turdy.
Aıta ketelik, bul juptan jeńimpaz bolǵan komanda jarystyń úshinshi irikteý kezeńinde «Makkabı» Tel-Avıv (Izraıl) jáne «Radnıchkı» (Serbııa) komandalarynan úzdik shyqqan klýbpen kezdesedi. Eki komanda arasyndaǵy alǵashqy kezdesýde «Makkabı» Tel-Avıv (Izraıl) komandasy 2:0 esebimen jeńiske jetti.
Sondaı-aq, 1 tamyzda Chempıondar lıgasy ekinshi irikteý kezeńinde elordalyq «Astana» syrt alańda Danııanyń «Mıdtıýlland» komandasymen kezdesedi. Olardyń arasyndaǵy alǵashqy oıyn 2:1 esebimen elordalyqtar jeńisimen aıaqtaldy. Al 2 tamyzda Eýropa lıgasy ekinshi irikteý kezeńiniń qarymta oıynynda Almatynyń «Qaıraty» syrt alańda Gollandııanyń «AZ Alkmaar» komandasymen sheberlik baıqasady. Almatyda bolǵan alǵashqy kezdesýde 2:0 esebimen «Qaırat» jeńdi.
Eýropa lıgasynda bıyl Qazaqstannan Pavlodardyń «Ertisi» de qatysyp, jarystyń alǵashqy kezeńinde Lıtvanyń «Trakaı» klýbyna 0:1 esebimen jol berip qoıdy.
