Eýropa lıgasy: «Tobyl» syrt alańda Grýzııany jeńdi
ASTANA. QazAqparat - 10 shilde kúni fýtboldan Eýropa lıgasynyń birinshi irikteý kezeńi oıyndary bastaldy. Elimizdiń atynan alǵashqy bolyp baq synaǵan qostanaılyq «Tobyl» syrt alańda Grýzııanyń «Samtredıa» komandasymen kezdesip, 1:0 esebimen basym tústi, dep habarlaıdy QazAqparat tilshisi.
Qostanaılyq klýb eýrokýbok oıyndaryna birneshe jyldan keıin qaıta oralyp otyr. Negizinde bul synǵa Shymkenttiń «Ordabasy» klýby qatysýy tıis bolatyn. Qazaqstan fýtbol federatsııasy birqatar talaptardy oryndaı almaǵan olardy bul jarystan shettetip, ornyna «Tobyldy» qosty.
Búgingi oıyn Grýzııa astanasy - Tbılısı qalasyndaǵy belgili fýtbolshy Mıhaıl Meshı qurmetine arnalǵan «Lokomotıv» stadıonynda ótti. Jasyl alańǵa «Samtredıa» sapynan Pogorelyı, Gýrýlı, Mamasahlısı, Gı, Makatsarııa, Bachıashvılı, Pantsýlaıa, Chachýa, Fatıch, Gogıashvılı, Endeladze shyqsa, «Tobyl» quramynda Nepogodov, Kassaı, Mıroshnıchenko, Dmıtrenko, Kvekveskırı, Nurǵalıev, Turysbek, Kankava, Jýlpa, Nóserbaev, Fedın boldy.
Oıynǵa Soltústik Irlandııadan kelgen tóreshi Tım Marshall qazylyq etti. Kezdesý Astana ýaqytymen 22.00-de bastaldy.
Matchtyń birinshi kezeńinde dop negizinen alań ortasynda júrdi desek te bolady. Kezdesýdiń 10-mınýtyna deıin qos qaqpaǵa dop baǵyttalǵan joq. Kelesi 45-mınýtta «Tobyldyń» basymdyǵy baıqalyp turdy. Dese de qazaqstandyq fýtbolshylar ol múmkindikterdi golǵa aınaldyra alǵan joq. Oıynnyń aıaqtalýyna sanaýly sekýndtar qalǵanda «Tobyl» sapynan Maksım Fedın alystan shirene dop teýip, ol qaqpa torynda týlap jatty. Osylaısha qostanaılyqtar jeńiske jetti. Esep - 1:0.
Esterińizge sala ketelik, Eýropa lıgasynda «Tobyldan» ózge Almatynyń «Qaıraty» men Pavlodardyń «Ertisi» synǵa túsedi. Atap aıtqanda, 12 shildede syrt alańda «Qaırat» Andorranyń «Engordan», «Ertis» Lıtvanyń «Trakaı» klýbymen sheberlik baıqasady. Qazaqstandyq úsh klýbtyń da qarymta oıyndary 19 shildede óz alańynda bolady. Al Chempıondar lıgasynda 11 shildede elordalyq «Astana» óz alańynda Chernogorııanyń «Sýteska» klýbyn qabyldaıdy.
