Eýropa lıgasy: «Ordabasy» jarystyń kelesi satysyna shyqty
NUR-SULTAN. QazAqparat - Shymkenttiń «Ordabasy» komandasy UEFA Eýropa lıgasy ekinshi irikteý kezeńine shyqty. Búgin olar syrt alańda Grýzııanyń «Torpedo» (Kýtaısı) komandasyn jeńip ketti, dep habarlaıdy QazAqparat tilshisi.
«Ordabasy» komandasy búgingi kezdesýde negizinen qorǵanysqa kóbirek kóńil bóldi. Bir apta buryn Shymkentte ótken oıynda olar 1:0 esebimen jeńgen edi. Sondyqtan shymkenttik klýb teń nátıjege qanaǵat bildiretinin ańǵartty.
Alań ıeleri shabýylyna birinshi kezeńde laıyqty toıtarys bere bildi. Esesine qarymta shabýyldarǵa kóńil bóldi. Dese de birinshi kezeńde eki komanda da bir-biriniń qaqpasynan sańylaý taba alǵan joq.
Ekinshi kezeńde de oıyn barysy dál osyndaı jaǵdaıda órbip jatty. Oıyn tizgini negizinen alań ıeleriniń qolynda boldy. Kezdesý sońyna taman «Ordabasy» eki gol soqty. Ony 81-mınýtta Mırzad Mehanovıch, 94-mınýtta Zıgı Badıbanga soqty. Osylaısha «Ordabasy» qarsylasyn 2:0 esebimen jeńdi.
Endi olar jarystyń kelesi satysynda Chehııanyń «Mlada-Boleslav» komandasymen kezdesedi.
Esterińizge sala ketelik, keshe UEFA Chempıondar lıgasy birinshi irikteý kezeńinde elordalyq «Astana» Rýmynııanyń ChFR komandasyna jol berdi. Endi «Astana» UEFA Eýropa lıgasy ekinshi irikteý kezeńinde Andorranyń «Santa-Koloma» komandasymen sheberlik baıqasady.
Al búgin Qostanaıdyń «Tobyly» Lıýksembýrgtiń «Jeness Esh» klýbyna teń oınap, qos oıynnyń nátıjesimen jarys jolynan shyǵyp qaldy.
Sondaı-aq, búgin Almatynyń «Qaıraty» Bosnııanyń «Shırokı Brıeg» komandasynan basym tústi. Almatylyq klýb UEFA Eýropa lıgasy birinshi kezeńinen súrinbeı ótti. Endi Izraıldiń «Hapoel» (Bezr-Sheva) jáne Albanııanyń «Lachı» jubynyń jeńimpazymen kezdesedi.
Foto: fcordabasy.kz
