Eýropa lıgasy: «Ordabasy» - «Rýsenborg» 1:2
ALMATY. 27 shilde. QazAqparat - Almatynyń Ortalyq stadıonynda keshe fýtboldan Shymkenttiń «Ordabasy» jáne Tronheımniń «Rýsenborg Ballklýb» komandalary arasynda Eýropa lıgasynyń 2-dárejelik raýndyndaǵy qarymta kezdesý ótti.
Onda Vıktor Pasýlko jattyqtyratyn qazaqstandyq aıaqdopshylar sapynan Mansýr Gýıe birinshi taımda 32-mınýtta esep ashqan. Úzilisten keıin qonaqtardan Fredheım-Holma 67-mınýtta esepti teńestirdi. Odan keıin araǵa on mınýt salyp qonaqtar alań qojaıyndarynyń ótkir shabýylyn toqtatý kezinde oıyn tártibin óreskel túrde toqtatqan. Tóreshi belgilegen 11 metrlik aıyp dobyn Artem Kasıanov sátti oryndaǵan, alaıda ony qazylar eseptemeı, aıyp dobyn qaıta oryndaýǵa nusqaý berdi. Júıkesi syr bergen "Ordabasy" kapıtany bul joly múlt ketti. Al oıynnyń sońǵy mınýtynda "Rýsenborg" oıynshylarynan Borjek Dochkal Almat Bekbaev qorǵaǵan "Ordabasy" qaqpasynan sańylaý taýyp, jeńisti qoldan birjola julyp alyp ketti. Tóreshi ysqyryǵy estilgen kezde tablodaǵy qorytyndy esep 1:2 bop aıaqtaldy. Buǵan deıin 19-shildede syrt alańda olar 2:2 esebimen teń túsken bolatyn.
