Eýropa lıgasy: «Ordabasy» rýmynııalyq klýbty orta jolda qaldyra ma
Aıta keterligi, bıyl jarystyń kelesi satysyna beriletin joldama jalǵyz oıyn nátıjesi boıynsha anyqtalady. Kezdesý Shymkent qalasyndaǵy Q. Muńaıtpasov atyndaǵy ortalyq stadıonda ótkiziledi.
Rýmynııalyq klýb 2001 jyly qurylǵan. Alǵashqy jyldarda óz eliniń fýtboldan chempıonatynyń ekinshi lıgasynda oıyn kórsetti. 2013 jyly sol lıgada birinshi oryn alyp, óz tarıhynda tuńǵysh ret joǵary lıgaǵa kóterildi.
Sodan bergi ýaqytta ekinshi lıgaǵa qaıtadan tómen túsip kórgen emes.
Negizinen týrnır kestesinde 8-10 oryndardy qanaǵat tutyp keledi. 2015 jyly komanda tuńǵysh ret Eýropa lıgasynda baq synaýǵa múmkindik aldy.
Sol jyly «Botoshanı» segizinshi oryndy qanaǵat tutqan edi. Dese de odan burynǵy tórt komanda UEFA tarapynan beriletin lıtsenzııaǵa qol jetkize alǵan joq.
Eýropa lıgasynyń 2015/2016 jylǵy kezeńiniń birinshi irikteý satysynda «Botoshanı» Grýzııanyń «Spartak-Tshınvalı» komandasymen kezdesti. Óz alańynda 1:1 esebimen teń túsip, syrt alańda 3:1 esebimen jeńiske jetti. Jarystyń ekinshi satysynda Polshanyń «Legııasymen» jolyǵyp, eki oıynda 0:1, 0:3 esebimen jeńildi. Sodan keıin rýmynııalyq klýb eýrokýbok dodasynda bıyl boı kórsetip otyr. Sońǵy chempıonatta olar týrnır kestesinde tórtinshi orynǵa taban tiregen bolatyn.
«Botoshanı» komandasynda negizinen jergilikti fýtbolshylar oıyn kórsetedi. Sondaı-aq, komanda quramynda Argentına, Albanııa, Grekııa, Horvatııa, Soltústik Makedonııa, Avstrııa elderinen kelgen oıynshylar bar.
Aıta keterligi, «Ordabasy» Eýropa lıgasynda bıyl altynshy márte baq synaıdy. Shymkenttik klýb 2012, 2019 jyldarda jarystyń ekinshi satysyna deıin jetti.
«Ordabasy» men «Botoshanı» klýbtary arasyndaǵy kezdesý elorda ýaqytymen 20.00-de bastalady. Oıyn «Elarna» telearnasynan tikeleı efırde kórsetiledi.
Sondaı-aq, búgin jarystyń atalǵan satysynda Almatynyń «Qaıraty» óz alańynda Armenııanyń «Noa» komandasyn qabyldaıdy.