Eýropa lıgasy: Qos aǵylshyn klýbynyń qaısysynyń baǵy janady
NUR-SULTAN. QazAqparat - Búgin ÝEFA Eýropa lıgasy fınaldyq oıynyn ótkizedi. Atalmysh kezdesý Ázerbaıjan astanasy - Baký qalasyndaǵy Olımpıadalyq stadıonda Anglııanyń «Chelsı» jáne «Arsenal» komandalary arasynda bolady, dep habarlaıdy QazAqparat tilshisi.
Qos komanda da budan burynǵy jyldarda negizinen Chempıondar lıgasy oıyndarynda baq synap júrgeni belgili. «Chelsı» komandasy 2011/2012 jylǵy kezeńde sol básekede kýbokty tóbesine kóterse, «Arsenal» 2005/2006 jylǵy kezeńde fınalǵa deıin jetti. Al alǵashqy ataýy Jármeńke kýbogy atalyp, odan keıin ÝEFA kýbogy bolǵan, odan keıin Eýropa lıgasy saıysy retinde jankúıerlerge belgili saıysta «Chelsı» 2012/2013 jylǵy kezeńde jeńimpaz atandy. Al «Arsenal» 1969/1970 jylǵy kezeńde dál sondaı jetistikke qol sozdy. Sondyqtan eki komanda atalmysh dúbirli dodada bir-bir márte kýbok ıegeri boldy. Búgingi jeńis qaısysyna da ekinshi júlde esebinde sanalady.
Byltyr «Chelsı» Anglııa Premer-lıgasynda besinshi oryndy qanaǵat tutty. Bul atalmysh komandaǵa ÝEFA Eýropa lıgasynda oınaýǵa múmkindik berdi. Týrnırde aǵylshyn klýby L tobynda synǵa tústi. Toptyq kezeńde Grekııanyń PAOK klýbymen 1:0, 4:0, Vengrııanyń MOL «Vıdı» komandasymen 1:0, 2:2, Belarýstiń BATE klýbymen 3:1, 1:0 esebimen oınap, óz tobynda birinshi oryn aldy. Odan keıin 1/16 fınalda Shvetsııanyń «Malme» klýbyn 3:0, 2:1 esebimen orta jolda qaldyryp ketti. Al 1/8 kezeńde Ýkraınanyń «Dınamosyn» 6:0, 3:0 esebimen tas-talqan etken olar shırek fınalda Chehııanyń «Slavııasyn» 4:3, 1:0 esebimen jeńip ketti. Jartylaı fınalda Germanııanyń «Aıntraht» (Frankfýrt) komandasymen eki oıynda da 1:1 esebimen teń túsken olar fınalǵa penaltı tebý arqyly shyqty.
Ótken jyly «Arsenal» Anglııa Premer-lıgasynda altynshy oryn alyp, ÝEFA Eýropa lıgasynyń toptyq kezeńine shyqty. E tobynda Ýkraınanyń «Vorsklasymen» 4:2, 3:0, Portýgalııanyń «Sportıng» (Lıssabon) klýbymen 1:0, 0:0, Ázerbaıjannyń «Karabah» komandasymen 3:0, 1:0 esebimen oınady. Olar jarystyń 1/16 satysynda Belarýstiń BATE klýbynan syrt alańda 0:1 esebimen jeńilip, óz alańynda 3:0 esebimen basym tústi. Al 1/8 fınalda «Arsenal» Frantsııanyń «Renn» komandasyna syrt alańda 1:3 esebimen ese jiberse de, óz alańynda 3:0 esebimen qarymta qaıtardy. Shırek fınalda Italııanyń «Napolıin» eki kezdesýde de 2:0, 1:0 esebimen jeńip, jartylaı fınalǵa joldama aldy. Jartylaı fınalda Ispanııanyń «Valensııasyn» 3:1, 4:2 esebimen súrindirdi. Osylaısha fınalǵa berilgen joldamany qaltaǵa basty.
Qos komanda búgingi kúnge deıin 198 márte ózara sheberlik baıqasty. Bul oıyndarda «Chelsı» 63 márte jeńiske jetse, «Arsenal» 76 ret myqty ekenin kórsetti. Al 59 kezdesýde jeńimpaz anyqtalǵan joq.
Boljam jasaýshylar búgingi kezdesýde eki komandanyń da jeńimpaz atanýǵa múmkindigi birdeı ekenin aıtady. Árıne, ony jasyl alań tórindegi sheberler tartysy anyqtap beredi.
Sondaı-aq, búgingi kezdesý ÝEFA Eýropa lıgasy bombardırin anyqtaýy múmkin. «Chelsı» shabýylshysy Olıve Jırý enshisinde 10 gol bolsa, «Arsenal» fýtbolshysy Per-Emerık Obameıang 8 goldyń avtory atandy. Endeshe, olar búgingi kezdesýde sol kórsetkishin jańalaýǵa múmkindik alady.
«Chelsı» men «Arsenal» arasyndaǵy kezdesý Nur-Sultan ýaqytymen 00.50-de bastalady. Oıyn Qazsport telearnasynan tikeleı efırde kórsetiledi.
