Eýropa lıgasy: Qazaqstandyq klýbtardyń yqtımal qarsylastary anyqtaldy
NUR-SULTAN. QazAqparat - Bıyl UEFA Eýropa lıgasynda baq synaıtyn qazaqstandyq klýbtardyń úshinshi irikteý satysynda kezdesýi múmkin qarsylastary anyqtaldy, dep habarlaıdy QazAqparat tilshisi.
Elordalyq «Astana» ekinshi irikteý satysynda Chernogorııanyń «Býdýchnost» komandasymen kezdesedi . Atalǵan oıynda jeńgen jaǵdaıda «Astana» týrnırdiń kelesi satysynda Bosnııa jáne Gertsogovınanyń «Saraevo» klýbymen oınaıdy.
Almatynyń «Qaıraty» úshinshi irikteý satysynda Reseıdiń «Rostov» klýbymen tartysqa túsýi múmkin. Ol úshin almatylyq ujym ekinshi irikteý satysynda Izraıldiń «Makkabı» (Haıfa) men Bosnııa jáne Gertsogovınanyń «Jeleznıchar» klýbynyń jeńimpazyn orta jolda qaldyrýy tıis. Aıta ketelik, ekinshi irikteý satysyndaǵy «Makkabı» men «Jeleznıchar» arasyndaǵy kezdesý qos komanda qyzmetkerlerinde koronavırýs ınfektsııasyna shaldyǵý dereginiń tirkelýine baılanysty 9 qyrkúıekke shegerilgen edi.
Al «Qaısar» ekinshi irikteý satysynda aldymen Kıprdiń APOEL klýbyn tize búktirýi tıis. Odan keıin týrnırdiń kelesi satysynda Slovenııanyń «Olımpııa» (Lıýblıana) men Bosnııa jáne Gertsogovınanyń «Zrınskı» jubynyń jeńimpazymen sheberlik baıqasady.
Esterińizge sala ketelik, Eýropa lıgasy ekinshi irikteý satysy 17, úshinshi irikteý satysy 24 qyrkúıekke belgilengen. Týrnırdiń irikteý satysyndaǵy barlyq jeńimpazy tek bir oıyn nátıjesi boıynsha anyqtalady.
