Eýropa lıgasy: Qazaqstandyq klýbtardyń úshinshi irikteý kezeńindegi qarsylastary anyqtaldy
NUR-SULTAN. QazAqparat - Qazaqstan klýbtarynyń fýtboldan UEFA Eýropa lıgasynyń úshinshi irikteý kezeńindegi qarsylasy anyqtaldy, dep habarlaıdy QazAqparat tilshisi.
Búgin Shveıtsarııanyń Non qalasyndaǵy UEFA shtab-páterinde Eýropa lıgasy úshinshi irikteý kezeńiniń jerebesi tartyldy.
«Astana» úshinshi irikteý kezeńine shyqqan jaǵdaıda «Ferentsvarosh» (Vengrııa) jáne «Valletta» (Malta) jubynyń jeńilgen komandasymen sheberlik baıqasady. Qazir elordalyq klýb ekinshi irikteý kezeńinde 23 shilde jáne 1 tamyz kúnderi Andorranyń «Santa-Koloma» komandasymen kezdesedi. Úshinshi irikteý kezeńi 8 jáne 15 tamyz kúnderi ótkiziledi.
Sondaı-aq, elimizdiń atynan Eýropa lıgasy ekinshi irikteý kezeńinde 24 shilde men 1 tamyzda Almatynyń «Qaıraty» Izraıldiń «Hapoel» (Bezr-Sheva), Shymkenttiń «Ordabasy» klýby Chehııanyń «Mlada-Boleslav» komandasymen kezdesedi.
Úshinshi irikteý kezeńine shyqqan jaǵdaıda «Qaırat» Shvetsııanyń «Norrchepıng», «Ordabasy» Armenııanyń «Alashkert» jáne Rýmynııanyń «Stıaýa» jubynyń jeńimpazymen kezdesedi.
