Eýropa lıgasy: «Qaısar» tájirıbeli qarsylasyn jeńe ala ma
NUR-SULTAN. QazAqparat - Búgin qazaqstandyq «Qaısar» UEFA Eýropa lıgasy ekinshi irikteý satysynda Kıprdiń APOEL klýbymen kezdesedi, dep habarlaıdy QazAqparat tilshisi.
Esterińizge sala ketelik, bul kezdesý qyzylordalyq komandanyń eýrokýbok oıyndaryndaǵy tusaýkeser oıyny bolmaq. Bul múmkindikke «Qaısar» 2019 jyly Qazaqstan kýbogyn alǵannan keıin qol jetkizdi.
Qyzylordalyq komandaǵa tájirıbeli klýb jolyqty. Jankúıerler APOEL klýbynyń áleýetin jaqsy biledi. Kıprlik komanda jylma-jyl eýrokýbok oıyndarynda oıyn kórsetip keledi. Klýb 1926 jyly el astanasy – Nıkosııa qalasynda qurylǵan. Sodan beri 28 márte chempıondyq ataqqa qol jetkizdi.
Bıyl atalǵan komanda óz elinde qola júldeni qanaǵat tutty. Sátsizdikke baılanysty norveg mamany Kore Ingebrıgtsen qyzmetinen ketti. Búginde ol qyzmetti grekııalyq Marınos Ýzýnıdıs atqarady. Ol 2002 jyly APOEL sapynda el chempıony atanǵan edi. Al 2007 jyly bas bapker retinde kıprlik klýbpen birge chempıon boldy.
Óz eliniń dop dodasyndaǵy sátsizdikten keıin bıyl komanda quramynda da kóptegen ózgeris jasaldy. Kelisim-shart merziminiń bitýine baılanysty uzaq jyldan beri negizgi qaqpashy bolǵan nıderlandtyq Boı Vaterman men grekııalyq Praksıtelıs Výros, shvetsııalyq Lınýs Hallenıýs, kıprlik Andreas Makrıs, Andreas Paraskevas, Andreas Artemıý, Stafıs Aloneftıs ózge klýbtarǵa aýysyp ketti. Olardyń ornyna ıordanııalyq Omar Hanı, makedonııalyq Ýrosh Matıch, brazılııalyq Alef, slovenııalyq Vıd Belets, serbııalyq Andrııa Pavlovıch, Mılan Evtovıch, ıslandııalyq Born Sıgýrdarson, portýgaldyq Andre Vıdıgal keldi.
«Qaısar» men APOEL komandalary arasyndaǵy oıyn búgin, 17 qyrkúıekte elorda ýaqytymen 18.00-de bastalady. Kezdesý Shymkent qalasyndaǵy Q.Muńaıtpasov atyndaǵy stadıonda bolady.