Eýropa lıgasy: «Qaırat» jankúıer úmitin aqtaı alǵan joq

Atalmysh eki komanda apta buryn Chehııada sheberlik baıqasqan edi. Ol joly «Sıgma» jaýapsyz eki gol soǵyp, «Qaırat» jaǵdaıyn qıyndatyp aldy. Sol ketken eseni «Qaırat» osy joly qaıtara ma degen úmit bolǵan. Degenmen oıyn biz kútkendegideı bolǵan joq. Chehııa komandasy alǵash bolyp esep ashty. Oıynnyń 19-mınýtynda «Sıgma» fýtbolshysy Martın Neshtor mergendik tanytty.

Budan keıin «Qaırat» shabýyldy údete tústi. Dese de almatylyq fýtbolshylar qaqpany dál kózdeı alǵan joq. Oıynnyń 34-mınýtynda «Qaırat» qorǵaýshyny shabýylshyǵa almastyrdy.  Nurálı Áliptiń ornyna Martın Eppel shyqty. Soǵan qaramastan «Sıgma» komandasy «Qaırat» qaqpasy mańynda birneshe shabýyl uıymdastyrdy. Ony Stas Poaktılov qaıtardy.

Máselen, 38-mınýtta ol eki márte osyndaı qaýipti sátte óz qaqpasyn saqtap qaldy. Birinshi kezeńniń sońǵy mınýttarynda alań ıeleri qarsylastar qaqpasy mańyn torýyldaǵan edi. Alaıda olardyń eshqaısysy dittegen maqsatyna jete alǵan joq. Birinshi kezeń 0:1 esebimen «Qaırattyń» jeńilisimen aıaqtaldy. 

Ekinshi kezeńde «Qaırattyń» shabýylǵa kóńil bóletini belgili edi. Óıtkeni, olar jarysty jalǵastyrýy úshin kem degende tórt gol soǵýy tıis. Soǵan qaramastan «Sıgma» eshbir saspastan 51-mınýtta taǵy bir gol soǵyp, bul jupta kimniń jeńimpaz bolatynyn erterek sheship qoıdy desek te artyq emes. Goldyń avtory - Davıd Goýska.

Eki oıynnyń nátıjesi boıynsha esep 0:4-ke jetti. Endigi kezekte «Qaırat» úshin bes gol soǵý mindeti turdy. Fýtbolda bári bolady degen senim de kóńil túkpirinde jatty. 61-mınýtta Marton Eppel esep aıyrmasyn qysqartyp, úmit otyn qaıta jaqqandaı boldy. Kezdesýdiń 75-mınýtynda «Qaırat» 10 oıynshymen qaldy. Alańnan qorǵaýshy Hýan Felıpe qýyldy. Al 94-mınýtta «Qaırat» sapynan Isael Barboza alańnan qýyldy.

Aıta ketelik, Chehııada ótken alǵashqy kezdesýde «Qaırat» qorǵaýshysy Ǵafrjan Súıimbaev alańnan qýylǵan edi. Sonda eki oıynda almatylyq klýb sapynan úsh oıynshy qyzyl qaǵaz alyp qalǵan.

«Qaırat» osylaısha 1:2 esebimen jeńildi. Qos oıynnyń esep nátıjesi 1:4-ke jetti. Sonyń saldarynan «Qaırat»  Eýropa lıgasyndaǵy jarysyn aıaqtady. «Sıgma» jarysty jalǵastyratyn boldy. Olarǵa endi Ispanııanyń «Sevılıa» nemese Lıtvanyń «Jalgırıs» komandasy qarsylas atanýy múmkin. Ispan klýby búgin syrt alańda Lıtvanyń Vılnıýs qalasynyń «Jalgırısimen» sheberlik baıqasady. Alǵashqy oıyn 1:0 esebimen «Sevılıanyń» basymdyǵymen aıaqtalǵan edi.

Eýropa lıgasynda bıyl Qostanaıdyń «Tobyly» men Pavlodardyń «Ertis» komandalary synǵa tústi. «Ertis» birinshi, «Tobyl» ekinshi irikteý kezeńinen árige asa alǵan joq.

Sondaı-aq, buǵan deıin elimizdiń atynan Chempıondar lıgasynyń irikteý kezeńinde synǵa túsken elordalyq «Astana» endi Eýropa lıgasy pleı-off kezeńine qatysady. Olar Chempıondar lıgasynyń úshinshi irikteý kezeńinde Horvatııanyń «Dınamosyna» (0:2, 0:1) jol berip qoıdy. «Astanaǵa» Eýropa lıgasy pleı-off kezeńinde Izraıldiń «Hapoel Beer-Sheva» jáne Kıprdiń APOEL jubynyń jeńimpazy qarsylas atanýy múmkin. Izraılde ótken alǵashqy kezdesý 2:2 esebimen teń aıaqtalǵan edi.