Eýropa lıgasy: «Qaırat» úshinshi irikteý satysyna shyǵa almady
NUR-SULTAN. QazAqparat - Almatynyń «Qaıraty» UEFA Eýropa lıgasy ekinshi irikteý kezeńinen árige asa almady, dep habarlaıdy QazAqparat tilshisi.
Esterińizge sala ketelik, Izraılde ótken alǵashqy kezdesýde «Hapoel» (Bezr-Sheva) 2:0 esebimen jeńiske jetken edi. Sondyqtan búgingi kezdesýde almatylyq fýtbolshylar kem degende úsh dop aıyrmasymen basym túsýi tıis bolatyn.
Kezdesýde «Qaırat» alǵashqy bolyp esep ashqan edi. Oıynnyń 40-mınýtynda Rade Dýgalıch «Qaırat» komandasyn alǵa shyǵardy. Birinshi kezeń 1:0 esebimen almatylyq ujymnyń basymdyǵymen aıaqtalǵan edi.
Bizdiń komanda endi bir gol soqqanda eki oıyndaǵy nátıje teńesetin edi. Odan keıin «Qaırat» taǵy bir gol soǵyp jatsa, jarysty jalǵastyrýǵa múmkindik alatyn. Degenmen oıyn barysy qazaqstandyq jankúıerler kútkendegideı órbigen joq. Aldymen 53-mınýtta «Qaırat» oıynshysy Eldos Ahmetov qyzyl qaǵaz alyp, jasyl alańnan qýyldy. Odan keıin 63-mınýtta Rade Dýgalıch avtogol soǵyp, tarazy basy teńesti. Budan keıin eki komanda tarapynan esepti ózgertetin birneshe qaýipti sát bolǵan edi. Dese de tablodaǵy sol esep ózgergen joq. Al 86-mınýtta «Qaırattyń» qosalqy quramda otyrǵan qaqpashysy Vladımır Plotnıkov te tóreshi sheshimimen qyzyl qaǵaz aldy.
Osylaısha «Qaırat» búgin qarsylasymen 1:1 esebimen teń tústi. Qos oıynnyń nátıjesimen «Hapoel» (Bezr-Sheva) komandasy jarystyń úshinshi irikteý satysyna joldama aldy.
