Eýropa lıgasy: «Qaırat» úshinshi irikteý kezeńine shyǵa ala ma

Eki komanda arasyndaǵy alǵashqy oıyn bir apta buryn Almaty tórinde boldy. Bul jekpe-jekte «Qaırat» 2:0 esebimen jeńiske  jetti. «Qaırat» sapynan eki goldy da ýkraınalyq legıoner Aderınsola Eseola soqty. Árıne, almatylyq ujymǵa birshama basymdyq alyp kelip otyr. Gollandııalyq ujym óz alańynda jaýapsyz úsh gol soqsa, jarystyń kelesi satysyna shyǵýyna múmkindik bar. Al «Qaırat» syrt alańda bir gol soǵyp alsa, onda alań ıeleriniń jaǵdaıy odan ári qıyndaı túsedi. Búginge deıin almatylyq klýb eýrokýbok oıyndarynda birneshe márte synǵa tústi. Degenmen onyń eshqaısysynda toptyq kezeńge jete alǵan joq. Bálkim, sol maqsatyna bıyl jetip qalar...

Atalmysh oıynnan keıin «Qaırat» el birinshiliginde bir kezdesý ótkizip úlgerdi. Ótken aptanyń jeksenbisinde olar óz alańynda Qostanaıdyń «Tobylyn» 1:0 esebimen  jeńdi. Al Gollandııada mundaı dop dodasy áli bastala qoıǵan joq. Onda alǵashqy týr 11 tamyz kúni bastalyp, «AZ Alkmaar» óz alańynda NAK komandasyn qabyldaıdy.

Aıta keterligi, «Qaırat» Eýropa lıgasynda buǵan deıin ekinshi irikteý kezeńinen árige asa alǵan joq. Endeshe, bul joly qalaı bolady? Eki komandanyń jeńgeni jarysty jalǵastyrady. Jeńilgeni jarys jolynan shyǵyp qalady. «Qaırattyń» bas bapkeri Karlos Alos Ferrer ázirge alǵashqy mınýttan kimderdiń jasyl alańǵa shyǵatynyn naqty aıta qoıǵan joq. Ol jarysty jalǵastyrýǵa qaısysynyń múmkindigi zor ekenine de jaýap berýge ázirge erterek ekenine toqtaldy. Oıynǵa kim daıyn ekenin dáleldese, sol fýtbolshy shyǵatynyn málimdedi.

Biz buǵan deıin «AZ Alkmaar» qazaqstandyq eki komandamen kezdeskenin aıtqan edik . Olar 2010 jyly Eýropa lıgasynyń pleı-off satysynda qazaqstandyq «Aqtóbe» klýbymen kezdesti. Aqtóbede olar 1:2 esebimen jeńilgenimen, óz alańynda 2:0 esebimen basym tústi. Odan keıin bizdiń «Shahtermen» toptyq kezeńde jolyqty. L tobynda jolyqqan qos komanda arasyndaǵy jekpe-jekte AZ óz alańynda 1:0 esebimen jeńiske jetse, bizdiń elimizde 1:1 esebimen teń oınady. Baıqasańyz, olar ekeýinde de óz alańynda jeńilgen joq eken. Árıne, bul jerde «Qaırattyń» jóni bólek. Komanda quramynda sheberligi joǵary fýtbolshylar kóp. Sondaı-aq, olar alǵashqy kezdesýde eki dop aıyrmasymen jeńiske jetti. Munyń ózi de olarǵa qosymsha kúsh bereri sózsiz.

Atalmysh kezdesý Astana ýaqytymen 00.45-te bastalady. Kezdesý «Qazsport» telearnasynan tikeleı efırde kórsetiledi. Bul jupta jeńimpaz bolǵan komanda 9 jáne 16 tamyzda Chehııanyń «Sıgma» klýbymen sheberlik baıqasady.

Atalmysh jarysta synǵa túsken Qostanaıdyń «Tobyly» 31 shildede Eýropa lıgasy ekinshi irikteý kezeńinde syrt alańda Armenııanyń «Pıýnıginen» 0:1 esebimen jeńildi. Al Qostanaıda «Tobyl» olardan 2:1 esebimen basym túsken edi. Osyǵan qaramastan qos oıyn nátıjesimen olar qarsylasyna jol berdi. Eýropa lıgasynda bıyl Qazaqstannan Pavlodardyń «Ertisi» de qatysyp, jarystyń alǵashqy kezeńinde Lıtvanyń «Trakaı» klýbyna (0:1, 0:0) jol berip  qoıdy.

Keshe, 1 tamyzda Chempıondar lıgasynyń ekinshi irikteý kezeńinde elordalyq «Astana» syrt alańda Danııanyń «Mıdtıýlland» komandasymen 0:0 esebimen  teń tústi. «Astana» óz alańynda olardy 2:1 esebimen tize búktirgen edi. Endi olar Horvatııa astanasy - Zagreb qalasynyń «Dınamo» komandasymen 7 jáne 14 tamyz kúnderi sheberlik baıqasady.