Eýropa lıgasy: «Qaırat» maqsatyna jete ala ma
ASTANA. QazAqparat - Búgin, 16 tamyzda Eýropa lıgasy úshinshi irikteý kezeńinde Almatynyń «Qaıraty» óz alańynda Chehııanyń «Sıgma» komandasyn qabyldaıdy, dep habarlaıdy QazAqparat tilshisi.
Eki komanda arasyndaǵy alǵashqy kezdesý Chehııanyń Olomoýts qalasynda ótkizildi. Ol oıynda alań ıeleri «Sıgma» klýby «Qaıratty» 2:0 esebimen tize búktirdi. Eki dop aıyrmasymen jeńilgen «Qaırat» úshin qarymta kezdesýde qarsylasyn oısyrata jeńý ońaıǵa túspeıtini anyq. Dese de biz «Qaıratqa» senim artamyz. Komanda aldynda bıyl Eýropa lıgasy toptyq kezeńinde synǵa túsý mindeti tur.
Eki oıyn arasynda «Qaırat» el birinshiliginde bir týrǵa qatysyp úlgerdi. Olar syrt alańda Petropavldyń «Qyzyljar» komandasynan 3:1 esebimen basym tústi. Osylaısha týrnır kestesindegi jaǵdaıyn da birshama jaqsartyp aldy. Qazir «Astana» men «Qaırat» komandalary arasyn nebári úsh upaı ǵana bólip tur. Alda taǵy bir aınalym bar. Endeshe, chempıondyqqa talas qyza túsedi. Altyn medal osy eki komanda arasynda júretini jankúıerlerge belgili.
Chehııa elinde dop dodasy endi bastaldy. Qazirge deıin 4 týr oıyndary bolyp ótti. Sońǵy týr qorytyndysymen «Sıgma» týrnır kestesinde 16 komanda arasynda 12-orynda tur. «Qaıratpen» kezdesýden keıin olar araǵa úsh kún salyp, 12 tamyzda el birinshiliginde Ýgerske-Gradıshte qalasynyń «Slovatsko» komandasymen kezdesti. Syrt alańda ótken oıynda «Sıgma» 1:3 esebimen jeńildi. «Sıgma» el birinshiliginde 4 oıyn ótkizip, onyń nebári 1-de ǵana úsh upaı oljalady.
«Qaırat» Chehııanyń ortanqol klýbynan aınalyp óte ala ma? Almaty klýbynyń kúshi oǵan jetetin sekildi. Ol úshin fýtbolshylar shıraq qımyl kórsetýi tıis. Qarsylastar qaqpasyna jaýapsyz úsh gol soǵý mindeti alda tur. Al oıyn barysy qalaı órbıtinin jasyl alań tórindegi tartysty báseke barysynda kýá bolamyz.
«Qaırat» Eýropa lıgasynyń birinshi irikteý kezeńinde Androrranyń «Engordan» komandasyn qos oıynnyń nátıjesimen 10:1 esebimen jeńgen edi. Odan keıingi ekinshi irikteý kezeńinde almatylyqtar Gollandııanyń «AZ Alkmaar» klýbyn óz alańynda 2:0 esebimen basym túsip, odan keıin syrt alańda 1:2 esebimen jeńildi. Qos oıynnyń nátıjesimen jarystyń kelesi satysyna «Qaırat» shyqty.
Búgingi kezdesýde «Qaırattyń» joly bolyp, jarystyń pleı-off satysyna shyǵyp jatsa, olarǵa Ispanııanyń «Sevılıa» nemese Lıtvanyń «Jalgırıs» komandasy qarsylas atanýy múmkin. Ispan klýby búgin syrt alańda Lıtvanyń Vılnıýs qalasynyń «Jalgırısimen» sheberlik baıqasady. Alǵashqy oıyn 1:0 esebimen «Sevılıanyń» basymdyǵymen aıaqtalǵan edi.
Sondaı-aq, buǵan deıin elimizdiń atynan Chempıondar lıgasynyń irikteý kezeńinde synǵa túsken elordalyq «Astana» endi Eýropa lıgasy pleı-off kezeńine qatysady. Olar Chempıondar lıgasynyń úshinshi irikteý kezeńinde Horvatııanyń «Dınamosyna» (0:2, 0:1) jol berip qoıdy. «Astanaǵa» Eýropa lıgasy pleı-off kezeńinde Izraıldiń «Hapoel Beer-Sheva» jáne Kıprdiń APOEL jubynyń jeńimpazy qarsylas atanýy múmkin. Izraılde ótken alǵashqy kezdesý 2:2 esebimen teń aıaqtalǵan edi.
