Eýropa lıgasy: «Qaırat» «Hapoelge» birde-bir gol soǵa almady
NUR-SULTAN. QazAqparat – Osy ýaqytta fýtboldan UEFA Eýropa lıgasynyń ekinshi irikteý satysy aıasynda Almatynyń «Qaıraty» men Izraıldiń «Hapoel» (Bezr-Sheva) komandalarynyń alǵashqy kezdesýi aıaqtaldy, dep habarlaıdy QazAqparat tilshisi.
Budan buryn Izraılde ótip jatqan oıynnyń alǵashqy kezeńiniń nátıjesi jaıynda habarlaǵan edik. Birinshi kezeńde alań ıeleri aldymen esep ashyp ketken edi. Soǵan qaramastan almatylyq fýtbolshylar táp-táýir oıyn kórsetti.
Ekinshi kezeńde de «Qaırat» jigitteri dopqa ıelik etý jóninen kózge tústi. Dese de, olar gol soǵatyn kóp múmkindikti múlt jiberip aldy. Atap aıtqanda, oıynnyń 50-mınýtyna deıin almatylyq fýtbolshylardyń alań ıeleri qaqpashysyn qapy qaldyratyn kóptegen sáti bolǵan edi. Olardyń biri qaqpashy qolynan tabyldy. Endigi birinde bizdiń jigitter qaqpany dál kózdeı alǵan joq. Esesine, qarsylas komanda ekinshi golyn soǵyp ketti. Ony 63-mınýtta Edın Shamır oryndady. Oń qanattan áýelete berilgen dopty qaqpaǵa soqqan ol, óz komandasyn jeńiske jaqyndata tústi.
Kezdesýde alań ıeleri 2:0 esebimen basym tústi.
«Hapoel» (Bezr-Sheva) búgingi kúnge deıin birneshe márte Eýrokýbok oıyndarynda synǵa túsip keledi. Eýropa lıgasynda eki márte toptyq kezeńge shyqty.
«Hapoel» (Bezr-Sheva) komandasynyń qurylǵanyna bıyl tup-týra 70 jyl tolady. 1949 jyly qurylǵan klýb alǵash ret óz eliniń birinshiliginde chempıondyq ataqqa 1974/1975 jylǵy fýtbol maýsymynda qol jetkizdi. Búgingi kúnge deıin bes márte altynnan alqa taǵyp úlgerdi. Sońǵy úsh jylda chempıondyq ataqty eshkimge ustatpaı keledi. Sondaı-aq, atalmysh komanda 1997 jyly fýtboldan Izraıl kýbogin tóbesine kóterdi.
Eki komanda arasyndaǵy qarymta kezdesý 1 tamyz kúni Almaty qalasynda ótkiziledi. Qos oıynnyń nátıjesimen jeńimpaz komanda jarystyń kelesi satysyna joldama alady.
Esterińizge sala ketelik, búgin Shymkenttiń «Ordabasy» komandasy syrt alańda Chehııanyń «Mlada-Boleslav» komandasymen 1:1 esebimen teń tústi.
Sondaı-aq, elordalyq «Astana» 24 shildede syrt alańda Andorranyń «Santa-Koloma» komandasymen 0:0 esebimen teń oınaǵan bolatyn.
