Eýropa lıgasy: «Qaırat» armenııalyq klýbpen sheberlik baıqasady
NUR-SULTAN. QazAqparat - Búgin UEFA Eýropa lıgasy 2020/2021 jylǵy kezeńiniń alǵashqy irikteý satysynda Almatynyń «Qaıraty» Armenııanyń «Noa» komandasyn qabyldaıdy, dep habarlaıdy QazAqparat tilshisi.
Armenııalyq klýbtyń qurylǵanyna bar-joǵy úsh jyl ǵana toldy. Alǵashqyda komanda «Artsah» dep atalǵan bolatyn. 2019 jyly klýbtyń aty «Noa» bolyp ózgerdi. Komandaǵa moldavııalyq Igor Pıkýşak pen Vadım Borets syndy bapkerler jetekshilik etti. Atalǵan klýb byltyr óz eliniń chempıonatynda kúmis júldeger atanyp, Armenııa kýbogyn ıelendi. Komanda el astanasy – Erevan qalasynyń atynan synǵa túsedi. Óz alańyndaǵy oıyndy «Alashkert» stadıonynda qabyldaıdy.
Komanda quramynda armenııalyq oıynshylarmen qatar Latvııa, Reseı, Gvıneıa-Bısaý, Kolýmbııa, Lıtva, Ýkraına, Italııa, Moldavııa, Portýgalııa elderinen kelgen fýtbolshylar bar. Solardyń biri – kolýmbııalyq Jordı Monroı Kolýmbııada dúnıege kelgen, onyń anasynyń ulty – armıan. Sondyqtan ol 2018 jyldan beri Armenııa ulttyq quramasy sapynda oıyn kórsetip keledi. Sondaı-aq, komanda quramynda qazaqstandyq esimi jaqsy tanys ýkraındyq Denıs Dedechko da bar.
Esterińizge sala ketelik, ol 2015 jyly «Astana» namysyn qorǵap, 10 oıynda 1 gol soqty. Komandada qaqpashy qyzmetin ıtalıandyq Valero Vımerkatı atqarady. Ol Italııanyń «Mılan» komandasynyń jastar quramynda oınaǵan. Odan keıin óz eliniń, Portýgalııanyń «Fatıma» jáne «Leırııa» klýbtarynda oıyn kórsetti. Ótken jyldan bastap «Noa» quramyna qabyldandy.
Armenııalyq klýb óz tarıhynda alǵash ret eýrokýbok oıyndarynda baq synaýǵa múmkindik aldy. Sondyqtan jarystyń kelesi satysyna joldama alýǵa bar kúshin salýǵa nıet jasap otyr.
«Qaırat» komandasy jyldaǵydaı bıyl da toptyq kezeńge shyǵýdy aldyna maqsat etip qoıyp otyr. Sol kúshin óz quramyna kóptegen belgili oıynshylardy qosty. Olardyń qatarynda kezinde Reseıdiń TsSKA (Máskeý) komandasynda dop tepken brazılııalyq áıgili fýtbolshy Vagner Lav aldymen atalady. Odan basqa da fýtbolshylar búgin «Qaırattyń» jarystyń kelesi satysyna beriletin joldamany qol jetkizýine úlken úles qosady degen senim bar.
«Qaırat» pen «Noa» komandalary arasyndaǵy kezdesý elorda ýaqytymen 20.00-de bastalady. Oıyn Qazsport telernasynan tikeleı efırde kórsetiledi.
Sondaı-aq, búgin Shymkentte «Ordabasy» men Rýmynııanyń «Botoshanı» komandasyn qabyldaıdy .
