Eýropa lıgasy: «Qaırat» Andorranyń klýbyn jeńe ala ma
ASTANA. QazAqparat - Búgin fýtboldan Eýropa lıgasy birinshi irikteý kezeńiniń qarymta oıyndary ótedi. Jarystyń atalmysh satysynda Almatynyń «Qaıraty», Pavlodardyń «Ertisi» jáne Qostanaıdyń «Tobyly» óz alańdarynda qarsylastaryn qabyldaıdy, dep habarlaıdy QazAqparat tilshisi.
Almatynyń «Qaıratyna» jerebe joldas boldy deýge negiz bar. Olar Andorranyń «Engordan» klýbymen jup qurady. Andorrada negizinen áýesqoı fýtbolshylar dop tebedi. Sol sebepti mamandar birden-aq «Qaırat» myqtylyǵyn tanytady degen boljamyn aıtyp qoıǵan edi. Atalmysh boljam alǵashqy oıynda rasqa aınaldy. Almatylyq ujym syrt alańda oınaǵanyna qaramastan qarsylasyn 3:0 esebimen tize búktirip qaıtty. Endeshe, búgingi oıynda «Qaırat» olarǵa qarsy jastardy shyǵarýy da ǵajap emes. Ony oıyn barysynda kóre jatarmyz.
«Ertistiń» de syrt alańnan upaı oljalap qaıtatyn múmkindigi bolǵan edi. Olar Lıtvanyń «Trakaı» klýbymen sheberlik baıqasty. Lıtvadaǵy kezdesýde alań ıeleri qaqpasyna 86-mınýtta penaltı belgilendi. Ony oryndaýǵa kelgende Sergeı Kıslıak dáldik tanyta alǵan joq. Tepken dopty «Trakaı» qaqpashysy qolynan tabyldy. Kezdesý 0:0 esebimen teń aıaqtaldy. Endeshe, bul juptaǵy jeńimpaz Pavlodardaǵy kezdesý barysynda anyqtalatyn bolady. Oǵan eki komandanyń da múmkindigi birdeı bolyp otyr. El birinshiliginde ala-qula oıyn kórsetip júrgen «Ertis» bul joly jınaqylyq kórsete ala ma? Atalmysh komandaǵa burynǵy bapkeri Dımıtar Dmıtrıev qaıta keldi. Atalmysh maman budan buryn jetekshilik etken kezeńde «Ertis» sheberligi joǵary ujymǵa aınaldy. Pavlodarlyq klýbtyń sol bir dáýreni qaıta oralar degen úmittemiz. «Ertis» jarysty jalǵastyrý múmkindigine qol jetkizse, Chernogorııanyń «Rýdar» jáne Serbııanyń «Partızan» komandalary arasyndaǵy jeńimpazben jolyǵady. Alǵashqy kezdesýde óz alańynda «Rýdar» «Partızannan» 0:3 esebimen jeńilip qalǵan edi.
Taǵy bir kezdesý Qostanaı qalasynda bolady. Jergilikti «Tobyl» óz alańynda Grýzııanyń «Samtredıa» klýbyn qabyldaıdy. Qostanaılyq klýb ótken aptada bolǵan syrt alańdaǵy kezdesýde qajetti nátıjege qol jetkizip qaıtty. Oıynnyń bitýine sanaýly sekýndtar qalǵan sátte Mksım Fedınniń soqqan goly «Tobylǵa» jeńis syılady. Esep 1:0. Qarymta kezdesýde qostanaılyqtar jınaqy qımyl kórsetip, kem degende teń nátıjege qol jetkizse, onda jarysty jalǵastyrý múmkindigine ıe bolady. Atalmysh juptyń jeńimpazy Armenııanyń «Pıýnık» jáne Makedonııanyń «Vardar» klýbtary arasyndaǵy jeńimpazben jolyǵady. Eki komanda arasyndaǵy alǵashqy kezdesý 1:0 esebimen «Pıýnıktiń» paıdasyna jazyldy.
Keshe, 18 shildede Chempıondar lıgasy birinshi irikteý kezeńinde elordanyń «Astana» klýby syrt alańda Chernogorııanyń «Sýteskasyn» 2:0 esebimen jeńip, jarystyń kelesi satysyna shyqty. «Astana» atalmysh qarsylasymen alǵashqy kezdesýinde 1:0 esebimen basym túsken edi.
