Eýropa lıgasy: «Ertis» eýrokýbok oıyndarynan shyǵyp qaldy
ASTANA. QazAqparat - Búgin, 19 shildede Eýropa lıgasynyń birinshi irikteý kezeńinde Pavlodardyń «Ertisi» Lıtvanyń «Trakaı» klýbyn qabyldap, qarsylasynan 0:1 esebimen jeńildi. Osynyń saldarynan olar eýrokýbok oıyndarynan shyǵyp qaldy, dep habarlaıdy QazAqparat tilshisi.
Pavlodarlyq ujym atalmysh qarsylasymen alǵashqy kezdesýinde 0:0 esebimen teń oınaǵan edi. Olardyń Lıtvadan oljaly oralý múmkindigi de bolǵan. Ekinshi kezeń de dál osyndaı jaǵdaıda órbigen edi. «Ertistiń» 86-mınýtta gol soǵatyn múmkindigi boldy. Tóreshi «Trakaı» qaqpasyna penaltı belgiledi. Ony pavlodarlyq fýtbolshy Sergeı Kıslıak golǵa aınaldyra almady. Onyń tepken dobyn «Trakaıdyń» qaqpashysy keri qaıtardy. Oıyn 0:0 esebimen teń aıaqtaldy.
Sondyqtan «Ertis» óz alańynda mindetti túrde jeńiske jetýi tıis edi. Osyny túsingen pavlodarlyq fýtbolshylar oıyn bastalysymen «Trakaı» komandasyna mańyna lap qoıdy. Degenmen shabýyldy túıindeıtin múmkindik bolǵan joq. Esesine lıtvalyqtar da qarymta shabýyldarǵa shyǵyp turdy. Olar óz degenine 21-mınýtta jetti. «Trakaı» sapynan Chıjas Svıaıýnas mergendik tanytty. Osylaısha óz komandasyn alǵa shyǵardy. Bul gol «Trakaıdy» jarystyń kelesi satysyna shyǵýyna múmkindik týǵyzdy. «Ertis» jarysty jalǵastyrýy úshin endi keminde eki dop soǵý qajettiligi týyndady. Osyndaı oımen pavlodarlyq fýtbolshylar shabýylǵa kóibek shyǵýǵa kóńil bóldi. Dese de bul maqsattaryna jete almaı jatty. «Trakaı» komandasy da qorǵanysta ǵana qalýmen shektelgen joq. Ózderiniń qaısar ekenin dáleldeýge tyrysty.
Ekinshi kezeń de dál osyndaı kóriniste órbip jatty. «Ertis» birden-aq shabýyl shebin kúsheıtti. Degenmen olardyń jasaǵan shabýyly nátıjesiz aıaqtalyp jatty. Pavlodarlyq klýb júıeli oıyn órnegin kórsete alǵan joq. «Ertis» osylaısha jarys jolynan shyǵyp qaldy.
Esterińizge sala ketelik, búgin Eýropa lıgasynyń birinshi irikteý kezeńinde Almatynyń «Qaıraty» óz alańynda Andorranyń «Engordan» klýbyn 7:1 esebimen tas-talqan etip jeńdi. Eki komanda arasyndaǵy alǵashqy kezdesý 3:0 esebimen «Qaırattyń» jeńisimen aıaqtaldy. Sondaı-aq, búgin «Tobyl» Qostanaıda Grýzııanyń «Samtredıa» klýbyn 2:0 esebimen tize búktirdi. Olardyń arasyndaǵy alǵashqy oıynda 1:0 esebimen bizdiń komanda basym tústi.
Keshe, 18 shildede Chempıondar lıgasynyń birinshi irikteý kezeńinde elordalyq «Astana» klýby syrt alańda Chernogorııanyń «Sýteska» komandasyn 2:0 esebimen jeńse, alǵashqy kezdesýde «Astana» 1:0 esebimen myqtylyǵyn tanytqan bolatyn.
