Eýropa lıgasy: «Chelsı» jáne «Arsenal» birinshi kezeńde gol soǵa almady
BAKÝ. QazAqparat - Dál qazir Ázerbaıjan astanasy - Baký qalasynda fýtboldan ÝEFA Eýropa lıgasynyń fınalynyń birinshi kezeńi aıaqtaldy. Fınalda Anglııanyń qos klýby - «Chelsı» jáne «Arsenal» klýbtary kezdesip jatyr, dep habarlaıdy QazAqparat tilshisi.
Aıta keterligi, bul kezdesýde bir memlekettiń bir qalasynyń qos komandasy bas báıgeni sarapqa salýǵa múmkindik alǵan . Mundaı erekshe jaǵdaı buryn-sońdy bolǵan emes.
Budan buryn habarlaǵanymyzdaı, «Chelsı» atalmysh jarysta bir márte jeńimpaz atanyp úlgergen. Al «Arsenal» sondaı tabysqa qol jetkize almaı keledi. Sondyqtan olar úshin búgingi kezdesýdiń máni zor bolyp otyr. Taǵy bir eskererlik nárse, bıyl ÝEFA Eýropa lıgasynda jeńimpaz atanǵan komandanyń aldaǵy fýtbol maýsymynda ÝEFA Chempıondar lıgasynda baq synaýyna jol ashylady. «Arsenal» Anglııa Premer-lıgasynda besinshi oryndy qanaǵat tutty. Bul arqyly atalmysh komanda ÝEFA Chempıondar lıgasyna shyǵa almaıdy. Al «Chelsı» óz eliniń birinshiliginde úshinshi oryn aldy. Sondyqtan olar ÝEFA Chempıondar lıgasynda baq synaýǵa múmkindik týyp otyr.
Búgingi kezdesýde «Arsenal» komandasy alǵashqy otyz mınýtta basymdyǵy baıqalyp turdy. Degenmen odan keıin «Chelsı» de qarqynyn údetip, qarsylasynyń qaqpasy mańynda kóptegen shabýyldy uıymdastyra bildi. Dese de birinshi kezeńde esep ashylǵan joq.
Qos komanda búgingi kúnge deıin 198 márte ózara sheberlik baıqasty. Bul oıyndarda «Chelsı» 63 márte jeńiske jetse, «Arsenal» 76 ret myqty ekenin kórsetti. Al 59 kezdesýde jeńimpaz anyqtalǵan joq.
Boljam jasaýshylar búgingi kezdesýde eki komandanyń da jeńimpaz atanýǵa múmkindigi birdeı ekenin aıtady. Árıne, ony jasyl alań tórindegi sheberler tartysy anyqtap beredi. Sondaı-aq, búgingi kezdesý ÝEFA Eýropa lıgasy bombardırin anyqtaýy múmkin. «Chelsı» shabýylshysy Olıve Jırý enshisinde 10 gol bolsa, «Arsenal» fýtbolshysy Per-Emerık Obameıang 8 goldyń avtory atandy. Endeshe, olar búgingi kezdesýde sol kórsetkishin jańalaýǵa múmkindik alady. Eki oıynshy da negizgi quramda jasyl alańǵy shyqty. Ázirge olar qarsylastar qaqpasyn dál kózdeı alǵan joq.
Jeńimpaz negizgi kezeńde anyqtalmaǵan jaǵdaıda taǵy da qosymsha eki kezeń qosylady. Onda da jeńimpaz belgili bolmasa penaltı tebý arqyly chempıon anyqtalady.
