Eýropa lıgasy: «Astananyń» qarsylastary jaıynda ne bilemiz?
NUR-SULTAN. QazAqparat - Elordalyq «Astananyń» fýtboldan UEFA Eýropa lıgasy L tobyndaǵy qarsylastary jankúıerge jaqsy tanys komandalar sanalady, dep habarlaıdy QazAqparat tilshisi.
Esterińizge sala ketelik, búgin Eýropa lıgasy toptyq kezeńiniń jerebesi tartyldy.
Odan keıin «Astana» synǵa túsetin L tobynyń oıyn kestesi belgili boldy.
Endi toptyq kezeńde «Astanaǵa» qarsylas komandalar jaıynda aıta ketkenimiz artyq bolmas. Aıta keterligi, «Astana» buǵan deıin olardyń eshbirimen kezdesip kórgen emes.
«MANChESTER ıÝNAITED»
Álem jankúıerleri «Manchester ıÝnaıted» jaıynda jaqsy biledi. Aǵylshyndyq klýb 1878 jyly qurylǵan. Búgingi kúnge deıin óz elinde (Fýtbol lıgasynyń birinshi dıvızıony men Premer-lıga) 20 márte chempıondyq ataqqa ıe bolǵan. Sońǵy ret 2012/2013 jylǵy fýtbol dodasynda altynnan alqa taqqan edi. Al 2017/2018 jylǵy kezeńde ekinshi oryn aldy. Qalǵan jyldarda úzdik úshtikke ilige almaı keledi. «Manchester ıÝnaıted» Chempıondar lıgasynda (Chempıondar kýbogymen qosa eseptegende) úsh márte jeńimpaz atandy. Al 2016/2017 jylǵy kezeńde Eýropa lıgasynda bas júldege qol sozdy. Al 1990/1991 jyldarda bir márte Sýperkýbokty tóbesine kóterdi. Sondaı-aq, 2008 jyly klýbtyq álem chempıonatynda chempıondyq tuǵyrǵa kóterildi. «Manchester ıÝnaıted» sońǵy fýtbol maýsymynda altynshy oryn alǵan bolatyn. Búginde komanda quramynda esimi álem jankúıerlerine jaqsy tanys qaqpashy Davıd de Hea, jartylaı qorǵaýshy Pol Pogba, Hýan Mata, shabýylshy Markýs Rashford, Eshlı ıAng jáne ózge de juldyzdar bar. Komandaǵa kezinde atalmysh komandany órge súıregen fýtbolshynyń biri Ýle Gýnnar Sýlsher bapkerlik jasaıdy.
«PARTIZAN».
Serbııalyq «Partızan» komandasy eýrokýbok oıyndarynda joǵary jetistigimen maqtana almaıdy. Komandanyń qurylǵanyna bıyl 74 jyl toldy. Aldymen ıÝgoslavııa, odan keıin Serbııa birinshiligin qosa eseptegende 27 márte chempıondyq tuǵyrǵa kóterildi. 1966 jyly Eýropa chempıondary kýbogynyń fınalyna deıin jetip, sońǵy sátte Ispanııanyń «Real Madrıd» klýbyna 1:2 esebimen jol berip qoıdy. Bıylǵa deıin 2010/2011 jylǵy fýtbol maýsymynda UEFA Chempıondar lıgasynyń toptyq kezeńine synǵa tússe, qalǵan jyldarda irikteý kezeńderinen asa alǵan joq. Al Eýropa lıgasynda 7 márte toptyq kezeńde baq synady. Sońǵy 2018/2019 jylǵy maýsymynda óz eliniń birinshiliginde qola júldeger atandy. Komanda quramynda negizinen jergilikti fýtbol túlekteri oıyn kórsetedi. Qazirgi kúni «Partızan» komandasynyń tizginin serb bapkeri Savo Mıloshevıch ustap otyr.
AZ «ALKMAR».
Gollandııalyq klýb 1967 jyldan beri oıyn kórsetip keledi. Búgingi kúnge deıin óz elinde 2 márte chempıon atandy. Oǵan qosa 2 márte kúmis, 7 márte qola júldege qol sozdy. 1980/1981 jylǵy fýtbol maýsymynda atalmysh klýb UEFA kýbogynyń fınalynda Anglııanyń «Ipsvıch Taýn» klýbyna jol berip qoıdy. Eýrokýbok oıyndarynda budan basqa joǵary tabysqa qol jetkizip kórgen emes. Óz eliniń sońǵy birinshiliginde olar tórtinshi orynǵa turaqtady. Komandaǵa jergilikti maman Arne Slot bapkerlik jasaıdy. Bul klýb Qazaqstan klýbtarymen eki márte kezdesip úlgerdi. Aldymen 2010 jyly Eýropa lıgasy pleı-off kezeńinde «Aqtóbe» komandasyn óz alańynda 2:0 esebimen jeńip, syrt alańda 1:2 esebimen jol berdi. Nátıjesinde toptyq kezeńge joldama aldy. Al 2018 jyly Eýropa lıgasy ekinshi irikteý satysynda olar bizdiń Almatynyń «Qaırat» komandasyna (2:1, 0:2) jol berdi.
Endi «Astana» komandasy jaıynda az-kem aıta ketkenimiz artyq bolmas. 2009 jyly qurylǵan komanda sodan beri bes márte chempıon atanyp úlgerdi.
Aıta ketelik, sońǵy bes jyldan beri olar turaqty túrde altynnan alqa taǵyp keledi. Sondaı-aq, 2015 jyldan beri Chempıondar lıgasy men Eýropa lıgasy toptyq kezeńinde turaqty túrde baq synap júr.
